第五波新冠疫情來襲，獅子山下連添亡魂，可憐得三四歲嘅細路仔，尚未見識過沒有病毒嘅世界…..香港醫療系統再次爆煲，病毒檢測進度趕唔上傳播速度，醫院外排滿老弱婦孺任由風吹雨打。直到傳來國家援軍抵港助陣嘅消息，港人先至喺絕望中見到曙光。

諷刺嘅係，正正喺內地援軍抵港翌日，卻傳出有人非法越境將Omicron病毒從香港帶進廣州嘅報道，牽連多個省市及無數內地居民。有說涉事偷渡客並非港人，唔可以將責任歸咎於香港。但亦有指相關人等係為避疫而鋌而走險，若然動機屬實，抗疫不力嘅香港又係咪全無責任？

今次唔係第一波第二波，已經係第五波疫情！醫療系統不勝負荷，檢測程序混亂不堪，就好似特區政府從未預料過會有咁嘅情況一樣，究竟喺前幾波疫情之中汲取了什麼？

香港人為對抗新冠肺炎疫情幾乎付出所有，特區政府話點就點，要限聚，好！禁晚市堂食，無問題！呼籲接種疫苗，即刻預約！口罩時時戴，安心日日掃，小商戶小市民個個勒緊褲頭、揸頸就命，只盼有朝一日疫情退散，香港繁華再現，內地關口重開，實現一家團聚呢一個再卑微不過嘅小小願望。

結果喺再次爆疫之時，換來有人大講風涼話，一再強調要求市民「支持」、「配合」、「自律」，講到好似香港人從來冇做到一樣。

國家二次調兵遣將助港抗疫，第一次，香港人滿懷感激之情；竟然有第二次，竟然需要第二次！港人除咗感激，今次多咗嘅，係慚愧！愧於抗疫不力，愧於不思悔改，愧於一次又一次拖國家後腿。過去幾年間，人情卡早已碌爆，日後嘅香港，仲有向國家予取予求嘅資格嗎？

原圖：大公報

https://www.wenweipo.com/a/202202/22/AP62142db9e4b036dce995c55d.html