都知道美國視中國為頭號競爭對手，但其實仲有一個國家，同樣將中國視為眼中釘，不過實力同老美比就真係天淵之別。呢個國家，唔使講，梗係印度啦。

印度總理莫迪上任之初，就大搞所謂「千億計劃」，企圖趁住中美貿易戰之際，挑戰「中國製造」嘅地位，妄想成為下一個「世界工廠」。呢個目標聽落好似幾威水，實際上卻係紙上談兵。2023年嘅富士康事件就係最好嘅例子。富士康曾經計劃喺印度建設半導體晶片廠，結果嫌印度效率太低，進展唔夠快，最後直接退出協議。根據路透社報道，呢個項目已經正式壽終正寢。印度製造業嘅「競爭力」喺呢件事上表露無遺，簡直係用「實力」演繹何謂失敗。

講到印度嘅奇葩操作，印巴衝突當然唔可以唔提。當巴基斯坦用中國製嘅殲-10戰機打得印度毫無還手之力嘅時候，本來輸咗就輸咗啦，家陣又未去到亡國咁大件事，但印度似乎好鬼死要面，竟然有大量印度媒體聲稱「大勝」。仲要吹到話擊落咗一架美國F-16D戰機，後來更加碼，聲稱擊落咗8架F-16D戰機，完全無視美國媒體嘅辟謠報道。睇嚟印度嘅「勝利」唔係喺戰場上，而係喺想像力上。

更離譜嘅係，印度政府竟然喺5月21日派出7支「勝利宣言」團隊，到唔同國家分享佢哋嘅「勝利喜悅」。據講佢哋嘅目標係走足32個國家，仲要去埋歐盟同聯合國總部。真係驚死人唔知佢哋「贏」咗，不過各國嘅反應就相當冷淡。例如日本外相岩屋毅同印度團隊會面嘅時候，全程得15分鐘，連攝影師都冇準備，擺明就係hea印度，根本就唔想理佢。

講到印度嘅創新能力，最近仲有一單笑到肚痛嘅新聞。英國一間曾經獲微軟同Amazon投資嘅AI初創公司，近日忽然宣布破產，原因竟然係佢哋嘅「人工智能」其實只得「人工」，背後全部係一班印度工程師假扮AI。係咪因為呢班工程師根本冇料到？睇嚟皮褸黃之前講嘅「全球一半AI人才都喺中國」呢句說話，可能真係有啲根據。

印度，一個咁嘅國家，有咁嘅總理，咁嘅政府，竟然仲以為自己可以同中國鬥？就算對自己實力毫無自覺都好，都要睇吓自己揀咗邊個做對手先啦！

（文章純屬作者個人意見，不代表本報立場。）