成日講「弱國無外交」，但弱，唔代表要跪到入地底。日本新任首相高市早苗就示範咗乜叫「自我矮化」，喺美國總統特朗普面前，搞到自己好似高級女公關，十足「三陪」咁款，真係「服務至上」做到盡，可以話係世間罕見。

10月28日，特朗普「臨幸」日本。高市小姐一早喺迎賓館掃榻以待，知佢最重排場，連儀仗隊都安排好，務求畀足面。但人哋侵王毫不買賬，行到日本國旗面前，直行直過，連眼神都慳返。鏡頭定格影住高市O晒咀，尷尷尬尬對住美國國旗90度鞠躬，然後小碎步追上去。特朗普話晒都係兩屆美國總統，外交禮儀會唔識？當然識。只不過，人哋連扮都懶得。與其話特朗普唔尊重，不如話佢從來冇將日本擺喺眼內，掂行掂過，你吹我脹？

更精彩表演陸續有嚟，被公開羞辱之後，高市仍然要切換「小迷妹」模式：陪睇棒球、挽手搭腰、甜笑打卡，喺美國航母上面笑語盈盈，步伐輕快到好似粉絲見偶像，紮紮跳兼轉圈圈，務求逗得侵王龍心大悅。一個「陪」字，從頭用到尾，專業十足、態度滿分。

睇返烏克蘭總統澤連斯基，雖然有求於人，少不免低聲下氣，但好歹仲叫有啲元首骨氣，起碼敢當眾同特朗普鬧交。到高市呢邊，低到出汁，究竟換到乜？收穫之一：特朗普一句「日本最偉大首相」嘅封號；收穫之二：日本輸美商品加徵15%關稅，真係「喜上加喜」。至於前首相石破茂簽落嗰筆5,500億美元對美投資，今次冇提，唔等於可以當粉筆字抹走；高市甚至要加碼奉上日本稀土，美其名兩國「共同開採」，其實就係畀人賣豬仔仲要幫手數錢。美日關係對等？笑吓好喇！

特朗普重提美國向日本投擲原子彈，形容只係「小衝突」（Little Conflict）——呢句說話一出，相信任何日本人都會當場黑面，但喺特朗普懷中被攬到實嘅高市，笑容管理依然在線，一句聲都唔敢出。日本在野黨直斥係「奉承外交」，唔少日本網民都話羞恥，覺得獻媚過火，丟晒國格。高市支持者就話，呢啲叫「現實主義」，為咗美國這把保護傘，總要低低頭。

但問題係，呢種卑躬屈膝換嚟嘅，可能只會係更深嘅依賴，同埋更沉重嘅代價，面子就已經輸晒，而裡子都未必保得住，長期用跪姿行外交，最後只會學識一樣嘢，就係點樣跪得更快、更流暢。

（文章純屬作者個人意見，不代表本報立場。）