如果你喺過去年幾兩年入面都喺香港生活，就算唔睇電視唔上網，只要你唔係摺到完全冇出門口，那怕你從不追星，即使你未必知道Mirror係乜，但都一定會聽過Mirror，因為呢隊組合嘅廣告真係多得非常誇張，基本上喺條街度總有一個Mirror嘅廣告或者海報喺左近。

Mirror點解喺香港咁紅？生得靚唔靚仔、唱歌好唔好聽、跳舞好唔好睇，呢啲都係好主觀嘅因素，總有欣賞與唔欣賞嘅人。但筆者就留意到黃友集中地「連登」討論區上，有一個好有趣嘅論調，因為黃友認為TVB係親中嘅「紅底」電視台，所以就要抵制，轉移支持其競爭對手ViuTV，而Mirror正是ViuTV力捧嘅組合之一。

有黃友一廂情願認為ViuTV係「黃底」台，Mirror更係黃色經濟圈嘅「抗爭」代表。但事實係如何？翻查資料，ViuTV屬電訊盈科子公司，佔有電訊盈科18.43%嘅第二大股東，叫中國聯通，由中國國務院資委擁有其98.45%股權。

雖然規模不及TVB，ViuTV咁大個電視台，入面當然有唔同政見嘅持份者。至於機構本身，一間第二大股東係國務院嘅電視台，竟然被吹捧成反抗「紅底」 TVB嘅代表，你話可笑唔可笑？

筆者無意幫任何電視台護航，但所謂政治立場絕對唔應該由黃友去界定，而係由當事人言行決定。起碼目前未見到ViuTV有好似改革前嘅港台咁播反中亂港節目；Mirror有成12個人，或者乜嘢立場都有，但至少未見到有成員大言不慚如阮民安、杜汶澤之流，反而仲有成員不避諱咁用仇中友至憎嘅簡體字、去黃友最討厭嘅富臨集團食飯添！如果因為黃友「屈黃」，藍營就要去反，不就正中下懷，徒添敵人？

電影《梅艷芳》上映成近日城中熱話，黃友又開始討論喇，話如果梅姐仍然在世，到底藍定黃喎！到底係對自己「理念」幾缺乏信心嘅人，先要咁搏命咁虛構認同感，去「壯大」黃色小圈子？

原圖：頭條日報，巴士的報

https://hd.stheadline.com/life/ent/realtime/2263154/

https://www.bastillepost.com/hongkong/article/8377007-