反修例暴亂兩年過後，黑暴勢力作鳥獸散，嗰班「叫人衝，自己鬆」嘅蛋散，一係就早早著草海外，一係就玩大咗搞到連自己都身陷囹圄。睇見香港戰線玩完，歐美諸國亦做吓樣，大開所謂「逃生門」，分別放寬移民或者居留政策，一班小黃人隨即歡天喜地、感恩戴德，只係爭在冇跪低感激流涕咁三呼女王萬歲……雖然可能真係有都唔出奇。

只見一眾「連登仔」非常搞笑，時不時就喺網上發文圍爐取暖，話最近阿邊個邊個舉家移民，機場每日有幾多幾多人走咁，仲要講到沾沾自喜咁款，真係難為一班「手足」正式淪為「condom仔」，當日前仆後繼咁衝，家陣前仆後繼咁踎！

到底香港依家係咪爆發緊移民潮？筆者冇深入研究亦冇興趣研究，無論你本身嘅政治立場係黃定藍，其實移民都只係好平常不過嘅事。就算我假設當中有一部份係因為香港政治環境改變而「走難」嘅黃友，但佢哋明明係敗走做「逃兵」，究竟嗰班被拋棄嘅「手足」喺度得意緊啲乜？

有黃友視移民為攬炒手段，認為移民潮會令香港人才流失、資金外流、樓價暴跌等等，所以移民就等於贏咗喎，成功攬炒！嗯……又好似講得好有道理咁喎，大家不妨自己上網搵吓過去一年香港樓市同股市嘅走勢？

一班只知用精神勝利法自我安慰嘅廢物，留喺香港既冇作為，想移民海外人哋又唔收，只能夠睇住幾張有人喺機場離境大堂嘅相片，意淫攬炒成功，明明輸到貼地都仲要懶係得戚，殊不知自己只係香港人眼中嘅孔乙己，真係笑大人個口！

原圖：星島日報、Pixabay素材網

https://std.stheadline.com/kol/article/3979