廣播處長李百全上任後大刀闊斧，先後抽起港台多個問題節目，《香港故事》、《議事論事》、當然唔少得好多香港人都最憎嘅《鏗鏘集》啦！李百全除咗推行審核機制確保節目質素、去除偏頗內容，更叫停港台再送作品參賽國外新聞獎，免得醜出國際。

以上種種動作，雖未敢講成效如何，但可以睇得出，李百全確係有心整頓港台，但似乎佢主要都係針對制度上嘅改革，似乎未能切中問題核心––「小黃人」！

港台問題絕非一朝一夕而成，「黃氣」可謂充斥喺香港電台每一個角落，想要徹底根除實在係不切實際，何況有不同政見本來就係再正常不過嘅事，重要嘅係唔好將個人政見帶入工作環境，令港台成為反中亂港嘅宣獨平台。

要儆百，必先殺一，港台主持利君雅劣行唔使我再多提，佢作為港台其中一個「黃色」嘅標竿人物，正係最好嘅開刀對象！

雖然利君雅已被中止公務員試用期合約，另簽為期120日嘅聘用合約，數吓手指都唔係剩返好多日子。利君雅當然冇得留低，但如果等約滿之後，先由得佢拍拍屁股走人，未免太便宜利君雅，同時可能會對港台內其他黃友發出錯誤訊息，不利李百全之後推行改革。

李百全想整頓港台，利君雅就必須要走，但唔可以係「離職」，而係一定要「革職」！請李百全彰顯改革決心，即炒利君雅！

原圖：港台新聞截圖