我哋嗰時，冇人敢阻港英收地，只要佢哋想收，一隊人，一把火，就收邊都得，冇人借環保阻頭阻勢，更冇人可以不遷不拆。人，都趕去徙置區，臨屋區，等上樓，都隨時四五年。有地，有香港人嘅錢，港英起幾多屋都得，重可以收地賣，唔好忘記高地價政策係港英留低嘅德政之一。
而家你哋成日講環保，唔准填海，唔准郁郊野公園，但又要有樓住，畀你哋做特首，你哋都想跳樓。
我哋嗰時，冇免費教育，一年免費都冇。當時得兩間大學，讀大學係奢望，成績好但冇錢都唔使諗。而家九年免費畀你哋讀書，重有成十間大學，阿豬阿狗都讀到大學，又有上一代捱埋畀你哋嘅資助，借埋錢都得。但你哋學咗乜嘢？大學係教你哋乜嘢？冇獨立思考、是非不分、人云亦云，不知所謂，粗口通大學貼，通街講，未能上流先已下流。
不學無術，志大才疏，我公司請CEO呀！你哋做唔做到？唔甘心從低做起，想一步登天。都係靠勤力，靠讀夜學、自修求上進。然後，雖然讀飽書，但因為學歷畀港英歧視，同工不同酬，捱十幾年，靠邊做邊學，累積經濟，培養能力，機會嚟嘞，至可以把握。記住，機會只留畀有準備嘅人，你哋有冇準備？與其才疏但志大，不如慳番埋怨嘅時間去進修，學上一代咁拼搏，學上一代咁一身兼數職去累積財富，好過嘥時間去搵借口話因為求理想、為香港人拚自由而去攪破壞，掩飾自己嘅無能，於事無補。
我哋嗰時，冇最低工資，冇綜緩，要改善生活，想買樓，唔會怨政府，因為知道港英唔會幫你，唯有靠自己雙手，做兼職，穿膠花，節衣縮食。唔好講去日本，假期都加埋班喇。去日本？同上月球一樣係夢想。
我哋嘅年代好包容，知道大家都係避難香港，唔似而家你哋咁大言不慚話自己係本土。知唔知香港畀英國佬搶走之時，1841年，人口只有7500人？你哋嘅祖先唔係呢7500人就唔好厚住面皮話自己係本土。自己都係移民，不過早咗上岸，唔應該歧視、敵視、排擠遲來者，咁只係話畀人知你哋係幾咁自私。同而家住喺填海區嘅人反對填海一樣咁面目可憎。
我哋嗰時邊有咁多公園呀！公園梗係公園啦！維園囉！植物公園囉！邊會區區都有大大個公園咁好㗎! 梗係冇大媽嘈啦！人人搵朝唔得晚，去公園都要等放工至去。嘈，周圍都嘈，廟街，大笪地，又唔係嘈到三更半夜？屋邨戶戶開大收音機，打麻雀，嘈唔嘈？我哋年代啲人就識得包容，唔會好似而家啲人咁，自己嘈就得，人哋嘈就投訴。
彭定康係事頭婆派過嚟玩香港嘅，當然冇人敢得罪啦！而且當時啲政客有品德得多，最惡嗰個李永達，鬧老彭都係一路拉隊離場一路嗌：shame on you。唔似而家啲政客咁又掟杯又掟蕉。我哋啲百姓更加冇聲出，鬧鬼佬要用鬼文，唔似而家你哋用本地話鬧特首咁爽，噏得出就得。我哋想問候彭老太咁，唔會好意思叫啲隨從繙譯畀老彭聽。
而家你哋啲民主自由都係得個講字，人家特首高官一落區就畀你哋圍，一開聲就畀你哋嘈到想講嘢都冇自由。落區又鬧，唔落又話唔落，人哋真係冇晒自由民主就真！
我哋嘅年代，人人梗知道要發展啦，唔似而家你哋咁懵，政府建設乜都話鬧係大白象，淨係一味拖後腳，搞到香港落後、再落後、更落後於鄰近地區。人哋新加坡、深圳唔講政治，埋頭經濟，香港就埋頭玩政治，寧願搞死經濟，都話要爭取民主，但有冇諗吓民主最終都係想人人生活富足安定，而家你哋搞到香港立立亂，就係為咗一張選票不惜令到自己屋企沉淪？
我哋嘅年代，的確冇官二代富二代，但有特權階級，即係英國鬼同高級華人。英國求其一個牛佬嚟香港都係我哋嘅老細，識唔識做嘢唔緊要，係鬼就得。我哋唔使人哋同你講話成功需苦幹，我哋自己就有上進心，都知道只有苦幹至有出路。但係就算出頭嘞，都只會畀鬼佬騎住，佢哋永遠係你老細，但我哋都唔會怨，因為知道怨都冇用。
我哋嘅年代，點會有民意？所謂民意直達政府都係你哋嘅幻覺，你哋誤信讒言。有就唔會有天星小輪加價暴動、的士暴動，唔會有巴士、電費年年加，不理民間疾苦啦！睇睇香港81、82……啦！舊劇集最能真實反映當時社會面貌，唔使聽人亂講。
當年何來泛民建制？所有議員都係欽點嘅，平民冇權投票。港英唔滿意，撤回欽點，唔使DQ咁煩，手起刀落，乾淨利落，鴉雀無聲。警察有投訴科，但打人都唔使拉入暗角，隨時隨街打就得，投訴囉！
以前議會冇爭執，因為啲議員唔係官守就係欽點。而家民選嘅議員就角色掉轉晒，泛民打住民主招牌，講咗政府就要聽，唔聽就係唔聽民意，就當香港真係只有一種聲音，佢哋呢種聲音就係金科玉律，永遠唔會錯嘅。咁係獨裁定係民主？係唔係一言堂？政府唔就範就用暴力，重無恥到賴政府迫學生暴力。
議會真係失效，惡就得，惡就話乜係真理就係真理，使乜辯論？使乜選舉？
我哋年代，對付暴動好簡單，警察以暴鎮暴。唔會有人盲撐暴徒手無寸鐵，唔會話警察手起棍落、打到暴徒當場爆頭係唔合理嘅暴力。唔會同情暴徒要港英特赦。港英梗有時間主動補鑊啦！而家呢？暴力一個緊接一個，完全冇畀機會政府檢討改革。我哋嗰時冇人可以叫港督落台。叫就暴力鎮壓，六七咪係叫港英滾蛋囉！而家你哋可以隨時叫人落台，隨時霸街阻路，隨時用磚掟警察，重惡到唔准警察還手，重想襲警都唔使畀人追究。而定民主真你惡。
我哋年代派傳單都拉（曾德成係人辦），點解而家霸街、嚴重破壞社會秩序就唔應該拉、唔應該告？
我哋嘅年代，人人都愛惜生命，但生活迫人，跳樓燒炭都唔係新聞，港英咁重視生命都無計可施，求其整個防止自殺會就當重視生命囉！死有輕於鴻毛，為咗一個立足於錯誤理解的立場而自尋短見，就係重於泰山？
總括而言就係，我哋嘅年代，不求政府救，胼手胝足，將香港建設成為大都會。
而家，香港大部分年輕人都係溫室栽培的嬌花嫩草，以為香港今日係佢哋嘅努力成果，大言不慚妄言要奪回以前美好的香港，（連一句口號都狗屁不通，既然係以前美好嘅香港，以前嘅香港係我哋呢代人拚搏番嚟嘅。奪，就係搶奪我哋嘅血汗。以前美好的香港唔係你哋有份建設嘅，你哋有乜資格奪回？唔再破壞我哋呢代人努力嘅成果已經要千多萬謝！拜託！）。不如借我哋嘅膊頭企高啲，望遠啲，承繼我哋嘅拚搏精神，唔好再事事政治化，將香港重轉番去前進軌道，追番因內耗而損失嘅時間重實際。
我哋都曾經激進、憤怒，對港英抑壓下作為二等人極端不滿，但我哋識得將激憤化為動力，自求進步，所以對你哋而家以破壞香港——我哋呢代人辛苦經營嘅家，表達激憤，絕對有資格譴責。你哋所謂嘅激進只係盲目破壞，破壞過後嘅香港只會沉淪，對香港將來毫無益處，不但破壞我哋呢代人建設嘅香港，亦係破壞你哋嘅將來，更破壞你哋下一代的將來。
醒吓啦！
親身經歷過你哋上一代嘅上一代人白
原圖：香港警察Facebook、幫港出聲
https://www.facebook.com/silentmajorityhk/photos/a.500993386656439/912248352197605/?type=3&theater
投票已截止，多謝支持
返回
