大家可能已知道（未知最好依家知）HKG報將於下週五（三月四日）下午六時推出「G線時事Show」，不少人會問：「周融，你搞乜鬼？」

太多人會問了，所以用這個自問自答環節先行作答。

Q：G線時事Show係乜嘢節目？

周融：電視睇唔到嘅電視節目！主線係時事，手法係G線，目的係做Show！

Q：講咗等如冇講！即係乜？

周融：下星期五睇咗，大家就清楚晒。

Q：做電視？乜你好多水咩？

周融：冇乜錢㗎。大有大做，細有細做，無記可以做，毛記都做得，再細啲，咪再「再」細啲做囉。HKG報咁細，我哋係micro-微做。

Q：你嘅政治取向係乜？有乜政治目的？

周融：吓，乜你連我嘅政治取向都唔知呀？我哋冇政治目的，只有收視目的！

Q：你講嘢呀？除咗收視，一定有其他目的！

周融：好，你敢問，我敢答！香港呢幾年，基本上係被一個仇恨運動在操控中。政棍、黃媒、政黨同一些人，由佔中起，係推緊香港去一個暴亂，甚至差過暴亂嘅地步。最慘係，佢哋好似幾成功喎！

我一直想，有乜對策？政府手軟，警方唔可以硬，有啲法官幫對方幫到出面，咁香港點算？

Well，沙士時，我哋笑洗手、洗手、洗手，因為我哋唔相信洗手係解決方法。後來，全世界才知道，咁簡單先係最有效嘅方法。而家，冇人會笑，只係一齊去洗手防疫。

大家點樣對付仇恨呢個疫症爆發？我相信笑就等同洗手。我們要開心，更加要笑埋佢哋，等仇恨病毒冇得傳播！G線時事Show就係呢個目的，我希望佢係1比99嘅消毒藥水。大家一齊笑，香港人愈開心，佢哋啲仇恨就困籠，愈難傳播出去！

我講真㗎，呢嗰唔係爛gag來呀！

Q：講番收視！你想有幾多收視？追無記？目標係毛記？

周融：講笑咩？點敢呀！HKG報去年五月創辦，至今九個月，Engagement一日都有十幾萬人，唔算好多，但係已經不錯。當然大過我們的網站多的是。我只敢同自己比，打破HKG嘅紀錄就已經開心了。

Q：點解做電視？係咪學毛記？

周融：如果要學，梗係情願學無記咁賺錢啦！HKG報係一個新聞時事，以文字為主嘅細網媒，進一步嘅發展一定是向電視(video)行。由去年第一日開始，這已經是目標。九個月後的今天實行到，已經係超越咗我們的時間表。其實G線時事Show係我們出品的第三個節目，第一個係「我們都是香港人」，而第二個係「屈穎妍人物專訪系列」。

Q：你們投資了多少？將來如何賺錢？

周融：小本經營當然有難處。不過，我一向都係創業人，永遠相信，get your product right, the money will right itself （只要搞好產品，錢係會繼續來），以往經驗證明咗此路係通嘅。所以目前我唔係太擔心。行快咗咁多，當然用多咗錢，下一步的資金如何？或者project crowdfunding都係一個方向。

Q：下一步是什麼？

最近嘅下一步，即係週末做乜？哈哈，捧兩個姓周嘅。

星期六再睇周星馳美人魚。笑多次。

星期日新東補選，投三號周浩鼎一票，支持和平建設，否決暴亂仇恨。

到下星期五下午六點，睇吓大家嘅反應，大家笑，我咪唔使喊囉，哈哈！

編按：立法會新界東補選候選人除了文中提及的周浩鼎，還有楊岳橋、黃成智、方國珊、梁天琦、梁思豪及劉志成。