蘋果輝煌不再，不單在銷售量上輸給華為，在5G時代來臨之際，有消息傳出，蘋果公司(Apple)遭晶片製造商英特爾(Intel)「跣鑊金」，恐怕會缺席今年5G手機的盛宴，堂堂iPhone竟然連5G都冇，睇怕蘋果日後只能仰視華為喇！

最快2020年先有貨交

英特爾曾宣布於2019年下半年交付5G晶片，點知埋門一腳「放飛機」，英特爾副總裁Sandra Rivera突然表示，今年只能為客戶提供「5G樣本晶片」，其商用產品最快要到2020年先可以交貨，等埋蘋果安裝晶片落手機，都唔知要等到幾時；蘋果為擺脫高通專利束縛，自iPhone 7開始便採用英特爾晶片，今次英特爾晶片甩轆，外界估計蘋果嘅iPhone恐怕要缺席今年嘅5G大戰。

與此同時，三星已搶先於本月21日發表5G手機，華為亦將於24日發表其最新5G手機產品，至於蘋果？就遙遙無期囉～

進入5G新時代，各方面都是以速度行先，速度足才有機會領先他人一步，正當華為三星等蘋果競爭對手都在爭取早日推出5G服務嘅時候，蘋果竟然出大事，加上華為5G技術領先全球，用實力講話，今次真係Byebye你條「美」啦！

原圖：蘋果官網