熱心食店為大學生提供食物贊助竟遭甩底，有冇搞錯！西貢一間炸雞店店主日前在Facebook發帖，指兩周前有香港科技大學的學生要求店舖贊助小食，店主爽快答應，豈料到交收之日，有關學生竟臨時一句取消咗就當冇事發生，仲要block埋店主WhatsApp，簡直一啲責任心都冇呀！

學生受惠 態度囂張

據該店店主分享，兩星期前有科大生對其展示「冰川社三學生會迎新營贊助計劃書」，要求贊助食物，但態度就非常囂張，店主允諾贊助200隻雞翼，但係班學生連多謝都冇句，仲竟然話係幫店家做宣傳喎，真係無恥到震。

事件曝光 無奈道歉

店主續指，交收日當天特意安排人手預早2小時回店準備食物，但有關學生竟然臨時話「取消」，更封鎖店主WhatsApp電話。一片好心遭到糟蹋，店主不禁大呻時下年輕人唔識尊重，「點解連一點點嘅尊重、禮貌同埋珍惜都唔識？」、「我是否不應該做好人？」

據《東網》報道，事件曝光後，涉事學生似乎知道避無可避，終於死死地氣親自同店主道歉，店主亦冇再追究，表示原諒。

大學生唔係淨係識讀書叻就夠，仲要修德，希望呢班友仔好好反省！

原圖：炸雞店Facebook圖片