DQ只係昨日下午發生嘅事，泛民大部份議員都仲未應到，所以今朝開會情緒好激動，累到財會流會。不過，DQ主角之一的社民連「長毛」梁國雄及DQ大配角的香港眾志「河童」黃之鋒嘅範式轉移得好快，DQ咗冇耐就攤大手板向支持者乞錢，認真犀利﹗ 先講長毛。話說DQ4今早到立法會做下騷衝一衝，順手過一過議員癮，之後長毛好「正氣」咁話唔想傷害到人所以唔入去。點解嘅？原來籌旗才是正本戲﹗長毛話明家陣「最重要是一個『錢』字」，希望集腋成裘畀科水他們打官司喎。他又唔怕唔好意思，列晒成條數畀大家睇，話初步估計上訴每人幾百萬，回水畀立法會又幾百萬，獅子開大口話明每人要一千萬，唔通佢當支持者係提款機？

一老一少 一字咁「錢」

至於一心Cap水嘅河童，昨日吹雞集會籌旗，點知人數不似預期。但河童未有氣餒，轉頭就在Facebook發帖，又係一字咁「錢」！河童有咁慘講到咁慘，聲稱「不論議員糾纏於繁複的上訴法律程序，對於訟費需要賠償也非常憂慮，抑或十多位議員助理面對的失業困境，還是政黨失去議員辦事處所提供的主要財政來源，我們也感到很疲憊」。 跟住戲肉登場，河童話香港眾志失去每月$200,000的辦事處營運開支後，八月後能否維持基本運作也成疑問。講到尾，就是呻冇錢，要你捐囉！河童隨即呼籲支持他們的年輕人，以小額捐款的月捐方式支持他們，同香港眾志一起渡過這個寒冬云云。連捐錢方法都幫你度埋，幾咁貼心兼user-friendly呢真係﹗ 自號「城邦國師」的陳雲馬上發帖串爆河童話，「原來組織示威集會是沒有定下目標的，……發現原來目標是要籌款」。他又叫河童放心，指他是小明星，「如果有補選，依然有虛偽中產投票給你的，因為你就是香港中產的真身，你可以安心當選議員啦」。 國師一針篤爆河童所謂支持DQ4搞集會目的，小編真係笑到肚都攣。講真，今均美爹閂水喉，肥金主又唔多掂，DQ4跟他們的好友都咪話唔頭痕呀﹗ 原圖：梁國雄、黃之鋒Facebook https://www.facebook.com/joshuawongchifung/photos/a.313299448762570.71779.200976479994868/1439515772807593/?type=3&theater https://www.facebook.com/longhairhk/photos/a.79833563252.78031.10795878252/10154107016268253/?type=3&theater

投票已截止，多謝支持