曾經喺被捕後大叫「與年輕人同行」嘅民主黨創黨主席李柱銘，睇住涉暴年輕人坐完一個又一個，自己即刻就變得有咁低調得咁低調，唔知係咪以為咁就冇人會記得佢做過啲乜衰嘢，點知卒之都係要臨尾香，12月27日畀特首李家超「摵柴」，褫奪佢長達44年嘅太平紳士身分。所謂衰開有條路，久未蒲頭嘅李柱銘難得有新消息，近日亦都被終審法院前常任法官烈顯倫數臭史，撰文直指李柱銘借大律師身分玩弄法治，將法庭變成政治舞台。

烈顯倫引用2014年「郭卓堅訴行政長官及特區政府」為例，當年李柱銘代表「長洲覆核王」郭卓堅申請司法覆核，挑戰「2014年行政長官就2017年行政長官及2016年立法會產生辦法向北京提交的報告」同「行政長官關於修改行政長官和立法會產生辦法的報告」。雖然最終法庭就駁回申請，但特首當時竟然要動用3名大律師，其中一個更加係資深大律師，而法庭就用咗足足一日聆訊，再頒布長達17頁嘅判辭。

烈顯倫指出，行政長官對於特區嘅管治，只需要對中央政府負責，而唔係對高院法官，當郭卓堅申請啟動訴訟的許可時，法庭應該直接駁回就得。佢形容郭卓堅雖然輸咗，但佢嘅首席律師李柱銘「毫無疑問地勝出」，唔單止將法庭變成政治舞台，更成功貶低咗行政長官嘅地位，損害任命特首嘅中央政府嘅權威。佢更形容呢種腐朽持續發展到2019年，就連特首發表施政報告都會被粗暴打斷，被迫轉用視像形式繼續。

李柱銘掛住「民主」嘅羊頭，再加埋自己大律師嘅身分，咁多年嚟真係呃咗唔少香港人。依家香港人越嚟越清楚，李柱銘所謂嘅「民主」其實只係一個幌子，背後隱藏著嘅係一種對法律同制度嘅輕視。佢用咗幾十年時間，將自己塑造成一個捍衛法治嘅形象，但實際上，佢只係喺玩弄呢啲口號嚟獲取支持。

不過李柱銘呢種人，就算被褫奪太平紳士身份，相信都唔會有咩反省，或者佢心中仍然覺得自己係正義嘅化身。其實，香港需要嘅係一班真心為市民著想，願意為法治而奮鬥嘅人，而唔係啲只識得打嘴炮嘅政棍。李柱銘帶俾香港人嘅教訓就係，無論係政治上定係法律上，我哋都要保持警惕，唔好畀呢啲人再次侵蝕我哋辛苦建立起來嘅法治基礎。唯有咁，我哋先可以捍衛真正嘅民主，唔再畀人濫用法律同司法去玩弄香港嘅未來，香港唔需要李柱銘，更加唔需要有第二個李柱銘。

（文章純屬作者個人意見，不代表本報立場。）