美國總統大選塵埃落定，特朗普勝選後，勢必牽動全球局勢，特別係地緣政治衝突，好似俄烏戰爭、中東危機，當然仲有台海穩定。早前有台灣地區嘅媒體去街訪當地年輕人，想知道特朗普當選後，邊個會係最大嘅輸家。結果不出所料，好多人都覺得係台灣地區領導人賴清德，或者台積電，總之，輸家就係台灣。原因好簡單，因為特朗普早就話過台積電係「晶片小偷」，仲講明如果當選就會向台灣徵收「保護費」。

特朗普贏咗之後，仲未正式上任，台灣已經開始向特朗普「表忠」。據英國媒體11月11日嘅報道，台灣已經接觸特朗普嘅團隊，商討買入大約150億美元（約1166億港元）嘅軍備，仲特別提到會買啲高價武器，為嘅就係「留下更深刻印象」。

民進黨一直話台灣係所謂嘅「主權國家」，將自己包裝成為兩岸紛爭中嘅受害者。佢哋既唔承認中國大陸對台灣嘅主權，又要對霸權卑躬屈膝，呢種矛盾真係幾諷刺。雖然民進黨每年用好多資源去討好美國高層，但似乎次次都押錯注，顯示出佢哋政治眼光真係唔太好。

睇返美國前國務卿蓬佩奧同美國駐聯合國前大使黑莉，先後喺2022年同2024年訪問台灣，去到之後講咗好多民進黨鍾意聽嘅說話，例如話要幫台灣對抗大陸威脅啊，話台島擁有所謂嘅「獨立主權」咁。當然，佢兩個都唔係自己主動話要去，而係民進黨或者佢哋資助嘅機構，洗咗過百萬港幣邀請去台島，為民進黨站台做「洗腦宣傳」。

之所以話民進黨眼光麻麻，係因為特朗普已經宣布咗，唔會搵蓬佩奧同黑莉加入佢嘅管治班子，民進黨洗咁多錢，嘥咗咁多功夫去討好人，一心仲以為自己泊到個好碼頭，點知原來搵埋嘅都係啲唔入流嘅「政治邊緣人」。

民進黨不斷透過討好同買武器嚟取悅美國，但其實，美國對台灣嘅支持多數只係口頭上，台灣喺佢哋眼中只係棋盤上嘅一粒棋。特朗普再度掌權，相信之後都係會將民進黨當成係提款機咁撳住拎，但真係有需要時，又有幾大可能性會出手幫忙？民進黨應該反思下，係咪真係要繼續行呢條錯誤嘅路。

民進黨押錯注嘅例子，當然唔止美國啦！立陶宛本身都同民進黨關係唔錯，但立陶宛10月結束國會大選，由社會民主黨勝出，候任總統帕魯克斯已經講到明，之前允許民進黨以「台灣」名義喺當地設立代表處，係「重大的外交錯誤」，佢上任後將會恢復同中國嘅外交關係。

如果要押注，應該揀最有前途、最有保障嘅方向。兩岸和平統一，唔單止係台灣嘅最佳結果，仲係整個華人世界嘅福音。民進黨同佢哋嘅支持者應該清醒吓，認清現實，唔好再押錯邊。唯有認識到和平統一嘅價值，加入中華民族偉大復興嘅行列，台灣嘅未來先會更加光明，更加有希望，而唔係喺國際鬥爭嘅大浪淘沙中，變成一個真正嘅「遺址」。

（文章純屬作者個人意見，不代表本報立場。）