跨大西洋奴隸貿易，一直都係英國嘅黑歷史，令無數民眾飽受苦難，到而家嘅影響仲係非常深遠，導致多國持續性貧困。而英國作為昔日最大嘅奴隸貿易國，無論係王室定政府，到目前為止都未有誠心認錯同賠償，新上任嘅施紀賢政府，更加係唔想提起呢啲過去嘅陰影，喺英聯邦會議上都唔願討論賠償問題。

你唔想討論，但人哋就偏要拎出嚟講。英國嘅國力，已經下流到簡直可以去打潛水比賽，連自己前殖民地嘅國家都唔放佢喺眼內。喺10月26日舉行嘅英聯邦政府首腦會議上，雖然施紀賢之前一早就講過，唔想講奴隸制賠償問題，但其他英聯邦領導人，似乎完全冇諗過畀面前宗主國。以前英國殖民地為主、由15個國家組成嘅加勒比共同體，一致同意討論「時機已到」，要求高達2000億英鎊（約合2萬億港幣）嘅鉅額索賠。至於點解「時機已到」？相信都係因為睇得出英國早已大不如前，咁就梗係要痛打落水狗啦！

無論英國喺出面扮得有幾威風都好，實際國內社會經濟一團糟，早就已經唔係咩秘密，據英國政府數據顯示，五分之一民眾生活貧困，就連國家醫療系統NHS都瀕臨崩塌。當年多事插手香港問題，可能以為搞個所謂5+1移民計劃，吸盡香港黃友嘅錢，就可以將佢哋嘅國家從財政困境中拯救出嚟。但現實係，連自己歷史債務都搞唔掂，點會有能力面對未來嘅挑戰呢。

面對諸國索賠，英國咩反應？施紀賢話到明唔會畀賠償金，而且對道歉嘅立場保持不變，即係唔諗住道歉，仲話叫人「向前看」，不如傾吓氣候問題咁話，藉口真係夠晒老套。呢種逃避歷史責任嘅態度，正正顯示出英國嘅虛弱同無力。叫人「向前看」？睇佢哋嘅奴隸貿易黑歷史？定係睇英國持續下流嘅未來？

當年英國「日不落」，依家變成「日落西山」，國力弱到被一沉百踩！當你見到英國仍然想以「大國」自居，實際上卻係一個連自己過去都唔敢面對嘅國家，你就會覺得，這種「偉大」，其實係最大嘅悲哀。英國下流，唔止係國力嘅下流，更係道德嘅下流，下流得咁有水準，真係要寫個服字畀佢！

（文章純屬作者個人意見，不代表本報立場。）