譚凱邦喺獄中已經過咗3年半，未來仲要坐幾耐都無人知，不過估唔到佢「屍骨未寒」，就畀佢啲「手足」挖出嚟「鞭屍」。呢位昔日嘅「戰友」、同樣曾係荃灣區議員嘅賴文輝，喺10月22日突然彈出嚟接受傳媒訪問，描繪譚凱邦喺獄中受罪嘅情況，乜舌底囊腫、皮膚潰爛，甚至熱到連平時拒開冷氣嘅譚凱邦都頂唔住。

賴文輝遠喺台灣，又好似對譚凱邦嘅健康狀況瞭如指掌，連譚凱邦舌底囊腫「目前情況已略有改善」都知，話佢久久未獲安排做手術，擔心良性囊腫可能會變惡性；又提到譚凱邦小腿「日前」受傷，但就因為天氣酷熱未能控制傷患。就咁睇篇訪問，你會覺得賴文輝好似好清楚佢個近況咁，仲以為譚凱邦同佢friend到要搵佢盡訴牢獄之苦。

但有趣嘅地方就係，訪問報道出街第二日，譚凱邦嘅老婆即刻出嚟要求澄清，咦，原來囊腫早已消失，皮膚感染都得到治療。

譚凱邦老婆話佢確實出現過舌底囊腫，但每次懲教署都會安排專科醫生，而且囊腫已經消失兩年幾，家陣完全康復，根本就唔使做手術，亦都唔會出現賴文輝所講嘅惡化病變。至於小腿皮膚受感染潰爛嘅問題，譚凱邦隻腳每次只要一發炎，亦都會被即刻安排入院，強調監獄內有醫院，醫院亦設有冷氣病房，「絕對冇得唔到適當治療」。

賴文輝自己都承認「有時忙開就冇寫信」，如果譚凱邦老婆所言屬實，腫囊早已消失兩年多，咁賴文輝個「有時忙開」真係忙到唔知去邊，失驚無神上演一場情深義重嘅戲碼，呼籲大家寫信畀譚凱邦，仲話要等佢「放學」之後去台灣相聚。

人生如戲，全靠演技，賴文輝擺出一副忠肝義膽嘅模樣，睇嚟係想貫徹譚凱邦堅持多年嘅環保意志，賴文輝呢種「環保利用」，真係將「綠色」發揮到極致。唔知當年譚凱邦喺推動環保議題嗰陣，會唔會諗到有朝一日，自己都會變成呢種「環保材料」呢？

（文章純屬作者個人意見，不代表本報立場。）