係人都知黃營最擅炒作，當黃氣愈係低迷，愈係如此，過去都出現過唔少黃店黃人，自編自導自演博取「手足」同情，最後都離不開一個錢字。睇吓「民安隊長」Tommy仔，作完故仔掠完水，都仲可以大模斯樣扮冇嘢咁，繼續喺英國做佢嘅鍵盤戰士氹人課金。

10月5日忽然有多間黃色媒體不約而同咁高調報道，由海外港人創辦嘅黃色媒體《如水》網站喺當日早上開始，無法再透過部份網絡供應商喺香港瀏覽，包括數碼通、3同香港寬頻，會顯示「無法連線至此網站」。而黃媒亦出奇地神速咁搵到已經流亡美國嘅《如水》主編張崑陽，成個flow就係咁流暢，務求令件事盡快「公諸於世」。

張崑陽接受黃媒訪問時，一嚟就鬧港府封鎖網站「極不合理」，聲稱打壓資訊，嚴重削弱香港言論自由云云，煞有介事咁大嗌「我哋唔會因為咁就驚」。就咁睇以為《如水》真係畀港府有關當局封殺，即刻有其他黃營中人衝出嚟，中國戰略風險研究所研究員Athena Tong指《如水》係媒體被封首例，以後唔知「標準紅線」點擺先得，擔心會造成寒蟬效應喎，總之又係想講香港冇自由囉！

黃營講到言之鑿鑿咁，但當保安局回應黃媒查詢有關事件時，發言人就巧妙咁叫黃媒自己搵返相關網絡供應商查詢，冇直接講有冇封殺《如水》網站，似乎係想睇佢哋自己表演咁。本費Ching自己都曾經試過幾個唔同嘅網絡供應商，嘗試連接《如水》網站，全部都成功上網一啲問題都冇，如果真係保安局出手封殺，又點會得部份網絡供應商出問題呢？當局做事又會唔會咁兒戲呢？只能講成件事真係耐人尋味。

由「攬炒巴」劉祖廸牽頭成立嘅黃媒《棱角》，上個月先告急，話籌唔夠27萬港元經費就要年底收檔，不過似乎就冇乜迴響，唔通有人受到啟發，想另出奇招博取關注？難怪有連登仔咁樣評論《如水》呢單嘢：「根本就係班國際線乞兒自編自導自演，每隔一排就搞啲小動作出嚟乞錢。」到底真相如何，本費Ching就不敢妄下定論喇，但相信大家嘅心水都係好清嘅，反正我哋呢啲正常嘅香港人又唔會課金嘅，咪當免費睇吓人哋呢檯內循環嘅黃圈大戲，笑吓咪算囉。

（文章純屬作者個人意見，不代表本報立場。）