近日喺立法會教育界嘅討論中，揭示咗一個有趣嘅現象，本地大型國際學校嘅收生情況反映出移民回流嘅趨勢，皆因唔少申請入學嘅學生或者係插班生之中，都揸住香港永久性居民身份證。立法會議員、教聯會鄧飛就表示聽過相關情況，據佢了解呢批回流學生大多嚟自有一定經濟能力嘅家庭，本身讀緊傳統名校或者Band 1中學，過去幾年隨屋企人移居海外，但因各種原因而回流香港，冇得讀返程度相若嘅學校，唯有轉投國際學校就讀。

過去幾年，有部份很傻很天真嘅港人一時衝昏頭腦，企圖尋找自己幻想中嘅烏托邦，有細路嘅就話外國教育制度好啲，冇細路嘅就話出面呼吸啖空氣都自由啲，總之就係個月亮特別圓。不過往往呢，理想很豐滿，現實就很骨感嘅，隨住就業、教育、生活質素、文化差異等問題陸續浮現，好多人先發覺原來離鄉別井真係唔係咁易㗎葉師傅！

不過香港人就好「醒目」嘅，無論講到外國有幾好，講到香港又有幾差，為下一代唔走唔得乜乜物物，點都會留返條後路畀自己，以防喺外國撈唔掂，諗住自己可以「彈出彈入」有咩事都隨時碌返香港。卒之為咗吸嗰一啖虛無縹緲、都唔知從來有冇在存過嘅所謂「自由空氣」，嘥錢嘥時間連心機都嘥埋，死死地氣返到嚟香港，本身間名校入唔返不特止，仲要同班「高才通」爭國際學校學位，一下唔覺意隨時「明年請早」，你話有乜為呢？

古語有云：「魚與熊掌不可兼得」，呢句說話雖然唔係絕對，但就適用於絕大部份嘅情況，偏偏好多人得一就想二，做人做事都抱住一種「我全都要」嘅心態，最後好有可能乜都得唔到，甚至失去本來已經得到嘅嘢。正如近日傳媒大肆報道嗰位申請移台被拒嘅陳姓公務員，諗住宣咗誓就可以喺香港體制內坐享其成，但背地裡又想喺台灣整條後路。可惜人算不如天算，佢「一腳踏兩船」嘅如意算盤被打得稀巴爛。台灣唔受佢呢套，話佢有安全風險，香港又停佢職，鐵飯碗危危乎，前程係咁先！

有啲人一方面想喺外國或其他地區享受所謂嘅自由與美好生活，另一方面又想保留香港嘅資源同機會，人性如此，係嘅我明，不過呢種左右逢源嘅心態，喺現實中唔係咁容易實現，人人期望可達到時仲唔天下大亂咩，呢種人往往會發現，自己最終乜都攞唔到，兩頭唔到岸咁半天吊，得返個「桔」囉。

原圖：文匯報圖片

（文章純屬作者個人意見，不代表本報立場。）