巴黎奧運步入尾聲，國家隊一如既往獲得驕人成績，今屆比賽對中國嚟講可以話係意義非凡。簡單概括一句，就係大家都可以睇得到，中國強大了！

如果大家有關心賽事，相信都會發現，每一場比賽只要有國家隊選手上場，觀眾席上必定係一片紅色浪潮，五星紅旗全場飄揚，「中國加油」之聲不絕。中國人入場支持國家隊選手好正常，但要知道今屆奧運唔係喺北京，而係喺地球另一邊嘅巴黎舉辦。機票連奧運會門票，真係唔係一般人可以負擔得到。全球經歷疫情打擊後可謂百廢待興，加上地緣政局不穩，先有俄烏戰爭，再爆以巴衝突，但中國即使面對住美國多年經濟打壓，人民仍然有餘裕出國消費，可見底蘊之深厚。

除咗一道道亮麗嘅紅色風景線，將巴黎奧運玩到好似中國主場咁款，遍佈巴黎每一個角落嘅「中國製造」亦都係一大亮點。由簡單嘅吉祥物公仔，到高端嘅運動設備，再到先進嘅AI技術，基本上都係由中國製造或提供技術。歐美把口就話要打壓中國，但去到關鍵時刻，始終都係要用中國貨。巴黎奧運就咁成為咗中國對全世界展示軟實力嘅最大舞台，「中國製造」憑住價廉物美嘅強大優勢，「支配世界」指日可待。

講返奧運比賽，中國泳隊一度被捲入禁藥風波。雖然美國人喺賽前不斷炒作，國家隊亦面臨史無前例咁頻密嘅藥檢，但潘展樂先喺百米自由泳中破世界記錄奪金，再同隊友喺男子混合泳接力賽中摘桂，既粉碎美國隊40年嚟嘅壟斷，亦粉碎咗一切對國家泳隊嘅流言蜚語。儘管有唔忿氣嘅西人西媒提子到爆，陰陽怪氣咁質疑潘展樂嘅成績，暗示佢靠禁藥贏得比賽，但唔通賽前人均超過20次嘅藥檢係假嘅？如果中國真係有能力造出可避過檢測嘅禁藥，國足早就已經稱霸世界。所以無論外界點樣質疑，都不過係跳樑小丑罷了，中國已經用實力說明了一切。

除咗收獲獎牌，收獲友誼亦同樣重要。中國羽毛球選手何冰嬌女單摘銀，佢帶住西班牙徽章上台領獎，向因受傷退賽的對手瑪蓮致敬，盡展大國風範，贏盡掌聲同尊重。亦話畀全世界聽，中國並唔只係著眼比賽成績，更重視比賽背後嘅奧運精神。比起爭強鬥勝，中國更希望促進國際友誼，展示和平與合作嘅態度。

中國強大了，靠嘅唔係船堅炮利，強大喺人民生活富足，強大喺「中國製造」，強大喺體育精神同國際友誼嘅推動，展示咗一個和平與合作嘅大國形象。無論係賽場上嘅優異表現，定係全球範圍內嘅技術影響力，都證明咗中國已經成為世界舞台上不可忽視嘅力量。未來，中國將繼續以實力同智慧，為全球發展貢獻更多正能量。

原圖：無綫新聞截圖、星島日報圖片

（文章純屬作者個人意見，不代表本報立場。