一個曾經喺政治風口浪尖，被黃營中人視為「女神」級嘅人物，忽然放低手中嘅「民主火炬」，改攞起自拍桿，搖身一變KOL，當年高呼要為香港帶嚟「自由」同「民主」嘅周庭，近年轉移活躍於包括YouTube在內嘅社交媒體平台上，不過佢似乎就唔多再提政治，唔知係咪打算全力洗底，專心搵銀，佢所追求嘅「民主」同「自由」到底值幾多錢？講到尾，原來都只不過係一堆可以標價出售嘅商品啫。

以前追求嘅係「崇高理想」，而家追求嘅係穩定收入，靠夢想賺錢，周庭真係玩出新高度。觀乎周庭YouTube Channel，共分三級付費會員制，依次分別係$25、$80、$200，其中最高級別嘅會員，更有專屬影片、優先睇片、小禮物等福利。為咗吸引課金加入會員，周庭更推出自己嘅個人Sticker，擺晒pose扮晒cute咁，將自己嘅大頭整成表情包，努力靠「賣萌」吸金。

曾經嘅周庭靠住出色嘅演技同詭辯技巧，贏得黃營支持者嘅認同，但我哋依家所睇到嘅，只係一個未能實現理想嘅失敗者，靠「賣萌」賺生活費，意味住佢喺政治舞台上已經失去咗實質影響力，只能依靠呢啲「廉價」嘅噱頭嚟維持關注度。曾經嘅「崇高理想」原來係咁不堪一擊，真係不禁要問一句，周庭，你嘅志向呢？

為求吸金吸到盡，周庭仲玩埋直播食飯吹水，真係睇到人o晒嘴，呢啲咁無聊嘅直播內容，一方面展示出佢非凡嘅「表演」才能，另一方面亦令人覺得佢嘅「藝術」實在太高深，普通人難以理解，但偏偏就有小黃人願意買單，一張張銀紙爭住進貢「女神」，呢種將支持者當ATM嘅行為，真係令人哭笑不得。翻查周庭最近其中一次直播，短短一個鐘多啲，就吸金幾千蚊港紙，食住飯就有錢收，真係諗諗都過癮，亦再次印證「人一黃、腦便殘」呢句說話，有錢做咩唔好呢，偏偏要睇人食飯？到底大家係為咗睇佢食飯，定係為咗睇吓呢位曾經嘅「民主女神」，點樣進行呢場自我放逐嘅表演？

澤仔由喜劇演員做到上總統，周庭則由政客做到落娛樂小丑，本質其實從來都冇改變過，然而，作為曾經嘅政治風頭人物，依家雖然唔講政治，但佢所消費緊嘅，咪又係以前剩落嚟嘅政治影響力，周庭今時今日嘅一言一行，係咪對得住支持佢嘅人，真係要問佢自己先知喇！最近周庭就喺YouTube社群上面徵集會員稱號，不過當然梗係得課金最多嘅高級會員先有份啦，大家話到底叫「頭號水魚」定「至尊庭魚」好呢？

（文章純屬作者個人意見，不代表本報立場。）