將軍澳7月3日發生一單罕見嘅綁架案，一個3歲男童竟然喺光天化日之下被擄走，事發時正值下午4點半，犯案地點更喺商場之內，匪徒揀咁嘅時間咁嘅地點落手，真係可以話係明目張膽、目無法紀。而正當現實世界被綁男童老母報案，警方全力緝兇之際，喺網絡世界又有另一場小風波。

曾為黃營網軍大本營嘅討論區「連登」，當晚10點幾就有人po咗案發CCTV截圖、綁匪嘅Telegram聯絡方法、勒索信件同要求贖金嘅對話截圖，發文者聲稱係轉載自某個WhatsApp群組。喺香港發生懷疑綁架案，絕對唔係啲乜嘢小事，但神奇嘅係，唔知點解「連登仔」們一睇到個post，第一時間既非通知警方，亦非靜觀其變，而係經Telegram發短訊主動挑釁，有「連登仔」更貼出用粗口短訊問候綁匪娘親嘅截圖。

雖然當時為未經證實消息，但事件絕非兒戲，被綁男童只得3歲，見到一班「連登仔」好似細路仔玩泥沙咁，討論區管理團隊亦忍唔住出手，刪除帖文中綁匪嘅聯絡方式。喺警方證實消息並成功救出被綁男童之後，討論管理團隊先至發出公告解釋：「以免衍生其他悲劇，基於人道考慮，我們決定介入處理」，處理方式包括暫時隱藏有關主題、隱藏曝露太多敏感資訊之留言及禁言滋事會員1天。

當時被綁男童仍然下落不明，但成班「連登仔」竟然罔顧男童生死，高舉「自由」旗號揮舞，不斷有人發帖，指責「連登」管理團隊刪帖禁言嘅做法，係打壓「言論自由」，更有人直指「連登」管理團隊「收Order做嘢」，懷疑同警方有合作，更有陰謀論者進一步推論，懷疑有唔少「手足」都係因為咁而畀人出賣喎！

明明發生咗咁大件事，點解成班「連登仔」可以咁冷血？唔通所謂「自由」真係「價更高」，高到可以凌駕喺香港市民嘅人命之上？所謂針唔拮到肉唔知痛，如果被擄嘅佢哋自己嘅骨肉，正心煩意亂咁等緊警方消息，見到網上面有人咁樣挑釁綁匪，又會有啲咩感想？萬一綁匪真係受到乜嘢刺激而撕票，呢個責任又由邊個去負，有邊個負得起？何況就算「連登」管理團隊真係同警方合作，阻止相關消息傳播，都只不過係盡咗每一個香港市民應盡嘅義務，又何罪之有？

「自由」固然可貴，但由2019年到2024年嘅今時今日，已經足足5年有多，似乎仍然有一班冥頑不靈嘅人，即使食咗咁多苦頭都仲未學精，唔明白凡事都有條線，過猶不及，認真無知，又可笑，又可悲。

（文章純屬作者個人意見，不代表本報立場。）

原圖：網絡圖片