47人顛覆國家政權案嘅被告，喺啱啱過去嘅星期二（6月25日）開始求情陳詞，其中第一批求情被告就有戴耀廷同區諾軒等，等呢單案塵埃落定之後，同黑暴、國安相關嘅重大案件審訊，亦都逐漸進入尾聲，同時亦代表住黃營另一「特殊職業」已經可以準備收檔，少咗班人喺市民面前篤眼篤鼻喇！

呢個「特殊職業」呢，黃營就稱之為「旁聽師」，唔知仲以為係咩專業分子，本人就覺得叫「旁聽黨」更為貼切，因為呢班人煩膠同惹人討厭嘅程度，比起嗰班收錢做嘢嘅「排隊黨」真係有過之而無不及。

咁到底「旁聽黨」係做乜嘢嘅呢？對外界嚟講，講得通俗啲，其實就係大型布景板，為咗「畫面靚」囉！試想一車車嘅「手足」送到法庭受審，完事再由法庭一車車咁送返入羈留所或者監倉，如果出入時，冇番十個八個「旁聽黨」傍住，追追囚車拍拍車門，再畀記者影吓相，容乜易畀人話當「手足」係condom㗎？！

而對於受審「手足」嚟講，呢班「旁聽黨」都係意義非凡㗎喎！例如47人案戴耀廷求情當日，有「旁聽黨」陳小姐就接受傳媒訪問，指到場旁聽係為咗令戴耀廷有得感受吓原來有咁多人支持佢；首位涉犯廿三條而被捕嘅李盈姿，亦有加入「旁聽黨」行列，仲話如果有得同被告講嘢，佢會話「你哋冇做錯」、「頂住」。

所以原來「旁聽黨」仲有麻痺嘅作用，麻痺被捕或牆內「手足」，等佢哋覺得自己係英雄，係義士，乖乖地喺入面唔好搞事，最重要係唔好亂講嘢吖嘛！麻痺外面嘅「手足」，嗱！其實我哋黃營仲好團結㗎，就算你入到去，都會好多人聲援你，唔會忘記你！

話說「旁聽黨」原來待遇都唔差，睇返黃媒報道，佢哋除咗會自備零食餅乾互相分享，仲有其他「有心人士」會幫佢哋補給糧食，大家一齊打吓牙骹吹吓水，夠鐘就入庭涼冷氣，見到鏡頭記得擺pose，有人訪問就記得話自己有幾「堅持」，輕輕鬆鬆又一day，唔怪得keep住都有新血加入啦！

隨住相關案件審訊進入尾聲，睇怕呢班「旁聽黨」都就快冇得撈，不過相信之後都仲有好多「崗位」要人，唔知佢哋會唔會考慮吓轉職做「探監黨」或者「寫信黨」呢？

原圖：星島日報