美國國務卿布林肯結束為期3日嘅訪華之旅，估唔到卻有意外收獲，仲學識點用掃碼支付，真係叻叻豬喇！

話說布林肯4月26日臨離開北京前，突然造訪一間唱片店，買咗美國流行樂壇天后Taylor Swift，同中國搖滾歌手竇唯嘅黑膠唱片。埋單嗰陣，隨行人員向布林肯詳細介紹，同示範點用掃碼支付，布林肯當堂表現出一副驚訝嘅樣。

據悉，當時隨行人員不斷向佢講解支付原理，仲話：「所以你必須隨身攜帶手機，好容易獲得二維碼」；隨行人員一邊點開手機屏幕一邊介紹：「你有二維碼，就係佢哋掃你；一係佢哋畀二維碼，咁你就掃佢。」

隨行人員準備好二維碼付款，等店員掃碼之後，佢就查看付款記錄，之後話畀布林肯聽：「付款成功。」 布林肯隨即露出驚訝嘅表情，仲講咗句：「噢！」

有媒體拍下呢一幕並發布影片，相關片段即時喺網上瘋傳，唔少網民留言恥笑布林肯「大鄉里出城」，有網民仲話：「這趟人類最後的文明之旅，對他來說真不容易。」

布林肯今次訪華，總算唔係空手而回，起碼都叫學識點用掃碼支付。不過唔知布林肯返到美國之後，會唔會話中國掃碼支付技術，影響美國國家安全呢？

原圖：無綫新聞影片截圖

https://reurl.cc/jWkedm