以色列與哈馬斯戰爭只是「暫時停火」，眾所周知，以色列總理內塔尼亞胡一直堅稱以軍會繼續呢場戰爭，直至徹底消滅哈馬斯，即係話以色列仍然會不顧人道主義，對加沙狂轟濫炸，無辜嘅平民百姓都唔知仲會死傷幾多人？

加沙衛生部日前表示，當地死亡人數增加到1.3萬，仍有6000人下落不明。教宗方濟各22日喺梵蒂岡，先後閉門會晤係今場以巴衝突中被挾持嘅以色列人質家屬，以及被殺巴人嘅家屬。佢事後喺聖伯多祿廣場呼籲信眾為和平祈禱，並祈求天主幫助以色列和巴勒斯坦人民解決問題。

事實上，以巴衝突擴散，若再打下去，美國總統拜登肯定非常頭痕！最新民調顯示。拜登支持度已因以哈戰爭跌至任內新低嘅40%，其中有49%民主黨支持者反對給予以色列軍事援助；另外於18歲至34歲受訪選民中，多達70%表示不認同拜登處理以哈戰爭嘅方式。要言之，就係不滿拜登盲撐以色列，一早偏𥘵以色列並持續向其提供致命武器。如今以色列總理內塔尼亞胡一直唔肯聽拜登支笛真正停戰，依然堅持以血腥、暴力剿滅哈馬斯，之不過因禍及太多無辜平民百姓，尤其至少已有5000名兒童死於呢場戰爭，引發嘅人道危機和國際輿論都令拜登感到壓力！

拜登曾向內塔尼亞胡發出警號：消滅哈馬斯可以，之不過濫殺無辜則不可容忍！教宗呼籲信眾為和平祈禱，祈求天主幫手解決衝突，無奈中東和平之路滿布荊棘！依筆者看，求天主打救和為和平祈禱，以求心靈之慰藉未嘗不可，而寄望中國做調解角色卻似乎更實際。美國喺中東顯然已經冇牙力，反而中國係中東漸發揮影響力！呢，最明顯嘅係沙特阿拉伯、伊朗等對中國「有計傾」，中國目前不但係聯合國安理會輪值主席國，而且係各國尋求協助化解以巴危機嘅頭號對象，不是嗎？阿拉伯和伊斯蘭國家嘅外交部長，自20日起組團四出訪問，首站正是中國。

各位，這並非偶然，只能說美國喺中東已得不到應有嘅信任，反而中國已成國際舞台焦點，以巴戰爭要勸和促談，達成「兩國方案」，落實中東地區真正持久和平，看來有待中國出馬！若然中國搞得掂呢壇亂象，必成天空中最亮的北斗星！

文章純屬作者個人意見，並不代表本報立場

原圖：Now新聞截圖