英國首相辛偉誠13日革除柏斐文嘅內政大臣職務後，引發逼宮危機。柏斐文並非省油嘅燈，佢翌日即公開3頁「辭職信」，怒斥辛偉誠軟弱、不誠實，令保守黨經歷破記錄嘅選舉失敗，指該黨已經冇時間，需要「緊急改變方向」。

道不同不相為謀。柏斐文其身不正早有前科，喺約翰遜政府擔任檢察總長時，佢唔單止曾超速駕駛，更被揭曾嘗試尋求特殊待遇以避過罰款及扣分；喺卓慧思政府首次擔任內政大臣時，又因私人電郵處理政府機密文件而引咎辭職。今次又因撰文批評警方不公而被辛偉誠革職，以佢咁嘅劣行斑斑，講真，根本唔適宜參政！

柏斐文被革除職務後，連鎖反應牽動英相內閣改組。令人嘖嘖稱奇嘅係：時隔7年，忽然把曾入主唐寧街十號卻因脫歐問題而引咎辭職嘅卡梅倫，再度召回出任外相。一般認為係想改善中英關係。外媒指，2010年至2016年卡梅倫任首相期間，英國對來自中國嘅投資持開放態度，開創咗中英「黃金時代」；卡梅倫2015年𨘋請訪英嘅習近平一起去酒吧大啖啤酒及炸魚，更被視為中英雙邊關係嘅高光時刻。

此時此刻，中美兩國正藉於三藩市嘅「習拜會」釋放善意，避免分歧，既然「大哥」也要向中國示好，改善中英關係亦大勢所趨。之不過，辛偉誠係弱勢首相，即使卡梅倫回朝，修好中英關係，甚至同中國多做生意，尋求經貿利益，恐怕亦難挽回低殘嘅民望！

英國自脫歐後亂成一片，疫情重創元氣，物價飛漲；自年初多地爆發債務危機，陷入破產邊緣，作為港人移民熱點嘅英國第二大城市伯明翰早前亦宣布破產！喺咁嘅背景及形勢下，辛偉誠「求變」冀改運可以理解！之但係一切或許已經太遲，民調顯示愈來愈多選民，寧願工黨再度上台執政！

事實上，工黨喺一連串嘅補選成績理想，譬如上月中旬舉行嘅下議院兩個議席補選，工黨攻陷保守黨傳統票倉，全取兩席，難怪其黨魁施紀賢面有得色，豪言工黨將喺下次大選取得勝利。辛偉誠要力挽狂瀾，單靠卡梅倫回鍋是否就掂？依家先同中國示好會否「愛得太遲」？當然，世事無絕對，只有真情趣，筆者祝佢好運！

文章純屬作者個人意見，並不代表本報立場

原圖：David Cameron Facebook

https://www.facebook.com/photo/?fbid=485380649616754&set=a.485380636283422