以巴戰火蔓延，以色列總理內塔尼亞胡早前發表全國電視講話，稱用前所未有力量打擊敵人，形容行動只係開始，將摧毀巴勒斯坦回教激進組織哈馬斯；其國防部長接受美媒訪問時亦承認，其步兵部隊及坦克已進入加沙地帶，準備展開突襲行動。

之不過，物極必反，正正由於以巴衝突以來，西方媒體一面倒譴責哈馬斯，終於引來反彈；近日亦出現唔少支持巴勒斯坦嘅言論。聯合國一直呼籲以方撤銷對加沙居民南遷嘅命令，伊朗外長阿卜杜拉•希揚警告，若以色列繼續犯下戰爭罪行及圍困加沙，肯定引起區內其他軸心嘅回應，意味可能開闢新戰場！伊朗最高精神領袖哈梅內伊14日指出，巴勒斯坦回教激進組織哈馬斯月初突襲行動，將引領所有巴人戰勝以色列，又指所有回教國家均有責任支持巴方。

以色列拋下狠話要把哈馬斯「連根拔起」；然而，至分仍未敢入侵加沙，主要係空襲炮轟，未敢打地面戰，外媒就指加沙多外國人質，尤其美國人質，是以投鼠忌器；此外又推說天氣差，有論者直斥係現代科技戰中最荒謬嘅藉口。以巴軍事實力懸殊，以軍勝利理所當然。以軍議而不決，決而不行，筆者相信以軍或怕如俄羅斯係烏克蘭城市遭遇嘅重大挫折，若然，一來冇面；二來咁失威怎可向國內外交代！

中東如今儼然成為火藥庫，加沙人道危機急速惡化。截至15日逾2450名巴勒斯坦人死亡，超越2014年歷時50天嘅加沙戰爭。美媒引述以色列軍官報道，預計新一輪攻擊將係以色列2006年入侵黎巴嫩以來最大規模地面行動，也是2008年入侵加沙以來首次嘗試奪取土地，可能陷入數個月嘅血腥城市巷戰。

哈馬斯已非吳下阿蒙

要把哈馬斯「連根拔起」，講就易！真要做到其實的確好難。哈馬斯長年使用通往埃及嘅地下隧道走私貨物和武器；以色列國軍唔係唔知，佢哋形容哈馬斯利用加沙猶如迷宮一樣嘅地下網絡，運送人口和貨物、儲存火箭和彈藥，並設置指揮和控制中心，以避開以軍偵測，以色列稱呼呢條長達500公里嘅隧道網絡為「加沙地鐵」。呢條地下隧道最初係用作從埃及走私武器和貨物，武裝分子哈馬斯亦曾利用隧道發動跨境突襲，譬如曾利用這隧道於2006年俘虜一名以色列士兵；2014年以巴衝突，以軍發動地面攻擊，試圖摧毀地下網絡，反遭武裝分子從後埋伏！以色列發動地面攻擊，會否遭到同樣埋伏，實在好難講。分析指要摧毀呢個地下迷宮並不易，皆因除咗哈馬斯，基本上冇人得知隧道全貌！以軍相信，數萬名哈馬斯武裝分子潛伏於北部加沙及周邊地區嘅地下隧道和地堡，佢哋可能炸毀隧道和引爆路邊炸彈與建築物。

再講，哈馬斯嘅武裝力量已非吳下阿蒙，其成員配備自製火箭、改良型AK-47等，自家廠房生產武器；哈馬斯麾下火箭最大射程，亦由2008年嘅40公里，躍升至2021年嘅250公里；而且擁有自屬軍校，其武裝部隊人數有4萬，包括海軍突擊隊，而1990年代，哈馬斯武裝分子不足一萬。要言之，以色列要將其「連根拔起」恐怕係一廂情願。

聯合國安理會16日就以巴衝突舉行緊急會議，並就俄羅斯主導嘅一份人道主義停火決議草案表決，草案只有中、俄等5國支持，未獲至少9票贊成，草案未能通過。

美國仍然企硬支持以色列，對以巴停火並不熱衷，始終講一套做一套，看來中東戰火延燒必定係一場世紀浩劫！加上俄烏戰事亦已打咗600日！戰火紛飛，這個世界會好嗎？冬天來了！春天卻仍然很遠！

原圖：新華社圖片

文章僅代表作者個人意見，不代表本報立場。