中東戰火延燒！以巴爆發50年來最激烈衝突，巴勒斯坦激進組織哈馬斯唔聲唔聲，嚇你一驚！其武裝成員直接潛入以國境內，大量以軍、平民被擄甚至被殺。哈馬斯將今次突襲行動命名為「阿克薩風暴」。

回顧一下歷史，哈馬斯喺1988年發布嘅舊憲章，誓言「把以色列從地圖上消除」。講真，以色列戰鬥力強，防範又嚴密，比起巴勒斯坦，真不可同日而語，更何況有山姆大叔背後撐腰，巴勒斯坦要將以色列消滅，講吓就易。

之不過，巴勒斯坦有計。2017年修訂嘅新憲章，哈馬斯不彈高調，立埸軟化，原來秘密練兵，喺以色列毫無防備下突破邊境圍欄，大肆殺戮，擄走士兵！以色列受到史無前例嘅重創，其總理內塔尼亞胡肯定顏面無存，內心一定啃不下這口烏氣，佢發表電視講話，宣布以國進入戰爭狀態，將全力摧毀哈馬斯，可見其難遏心中怒火！

以軍連日大舉轟炸哈馬斯控制嘅加沙地區，殲滅地面嘅武裝分子後，國防軍周二（10月10日）宣布成功封鎖加沙邊境，並於邊境周圍埋下地雷以防敵人再入侵。埃及政府面對以色列軍方密集轟炸，乃關閉與加沙南方接壤嘅拉法通道，意味住加沙連唯一嘅逃生出口也失去。

此外，以色列已經切斷加沙地帶嘅電力、食物、燃料供應，更派出戰機展開報復性空襲！可以想見，以色列國防軍宣布展開「鐵劍行動」亦非玩玩下！有人形容，以色列展開報復性行動，唔係「甕中捉鱉」，而係「甕中屠鱉」！要言之，以巴互相殺戮，雙方都殺紅了雙眼！兩國嘅平民百姓，又係受到慘無人道嘅屠殺，確係沒有最血腥，只有更血腥！

美國支持以色列，美國總統拜登只一味派航母馳援，甚至派國務卿布林肯啟程往以色列，討論可以為以色列提供乜嘢額外資源。唉！火上澆油，無過此者！

對於以巴戰火蔓延，俄羅斯總統普京表示，以巴新一輪衝突反映美國喺中東政策失敗，批評美國試圖壟斷調解衝突，但係冇專注尋求雙方都能接受嘅妥協方案。旨哉斯言！呢個見解同中方有共識，中國指出以巴衝突，癥結係遲遲末能公正解決巴勒斯坦問題，即冇落實「兩國方案」！

哈馬斯根本不畏死，老美以為派航母增援施壓就可以，未免又落入「誰大誰惡誰正確」嘅自我欺人圈套！世界變，山姆大叔思想唔變，仲以為自己「好打得」，連沙特都唔聽佢支笛喇！美國「話語權」已經今非昔比，想「重返中東」都冇咁易。

有老美插手一日，世界一日也難以安寧！

原圖：新華社

文章純屬作者個人意見，並不代表本報立場