俄烏戰事至今已逾年半，客觀來說，烏軍開展3個多月嘅大反攻，效果不似預期，而且客觀形勢對烏克蘭的確不妙，波蘭、法國等都表示不再提供武器。波蘭供給烏克蘭嘅軍援都排第6位，僅次美國、德國、英國、挪威和丹麥，真金白銀都33億美元吖！更重要嘅係，波蘭收留咗150萬烏克蘭難民，此時此刻，如果連波蘭咁堅定嘅盟友，都對撐烏動搖，其他西方國家可想而知！

烏克蘭總統澤連斯基眼見美國及西方國家對援烏出現嚴重分歧，即使美國總統拜登有心援烏，之不過共和黨死硬派、極右派大力反對援烏，240億美元撥款恐怕「凍過水」，你叫澤連斯基怎麼不是如熱鍋上的螞蟻？何況西方國家亦多財困，正所謂「國國有本難唸的經」，即使仍答應供應坦克、火炮、無人機等，亦非一時三刻就可給予補給，可見戰事再拖下去，烏克蘭想「大反攻」，根本係得啖笑！烏克蘭發言人常自詡如何重創俄軍，其中唔少係死人燈籠報大數！

靠吹有用咩？你睇美國前總統特朗普缺席初選次輪辯論，民調顯示佢拋離共和黨對手37個百分點！可見政客廢噏已不能成秘笈。又睇吓拜登喺第二屆美國與太平洋島國領導人論壇峰會，佢忽然鍾情迷你國，還不是為了藉着提升與太平洋島國嘅關係，強化亞太戰略部署，要言之，就係要抗衡中國。之不過，所羅門群島總理索加瓦雷早前就表示拒絕參加峰會，佢嘅理由簡單直接，就係唔想聽「別人說教，說美國有多好」，佢國內有更多事務要處理。呢個「別人」，呼之欲出，梗係拜登啦！所以話「不誠無物」，政客要自愛，身處逆境又冇料，就咪亂噏廿四，講多錯多，徒惹笑柄及更易露底，務實才是根本。

澤連斯基勢自討沒趣

事實上，俄羅斯總統普京亦並非一味好戰。佢喺7月尾會見到訪嘅非洲領導人時，稱「不拒絕就烏克蘭問題進行和平談判嘅想法」。俄外交部嘅聲明則稱，「除了憲法所宣布嘅四州外，對烏克蘭領土並無要求」。言下之意，烏克蘭欲「和平」嘅前提，係烏方承認俄吞併頓涅茨克、盧甘斯克、扎波羅熱和赫爾松四州喺戰後被俄控制嘅領土。至於早喺2014年就被俄羅斯佔領嘅克里米亞半島，俄羅斯早視作理所當然吞拼，未被提及。

澤連斯基當時眼見美國及西方如英國、加拿大、日本、南韓等嘅大力支持，軍援源源不絕，「伸手就有」，邊會把俄方嘅聲明放眼內？佢提出「十點解決方案」推動和平，寸步不讓，寸土必爭，正是要俄羅斯從包括克里米亞在內嘅所佔領土上撤軍。咁大想頭，一點「和平」談判意願都冇，強人普京真係睬你都傻！

今時今日，情況逆轉，尤其美國本身財困，筆者上文已提過，不贅。拜登為競選連任，已經忙得不可開交，加上共和黨同佢對着幹，年事已高嘅拜登已狂嗌「吃不消」！澤氏再為軍援、導彈、F16戰機死纒不休，恐怕只會自討無趣！筆者上文叫佢快「止蝕」並從速「止戰求和」！畢竟黃粱一夢，終歸泡影，係時候醒來了！

原圖：新華社

文章純屬作者個人意見，並不代表本報立場