話說日前有一段長達5分鐘喺地鐵入面拍攝嘅影片，一個疑似因讀書壓力而爆煲嘅小學女生，喊晒口咁向媽媽哭訴，不停喊住話好辛苦。

個女仔話：「唔鍾意讀書，國語數學都好辛苦，我依家已經唔舒服，仲要日日返學，好辛苦，晨早流流咁早起身，你去睇手冊我真係好辛苦，你知唔知呀？」

佢又話：「冇人鍾意我，我好慘，同學唔鍾意我，我大個都唔好，你咁樣對我我好慘，冇人同我玩，我連同學都冇一個，你哋啲大人都冇得改，我都唔知忍得幾耐我真係頂唔順，生存喺呢個世界上。」

真係聞者傷心，聽者流淚，雖然我哋唔知最後個女仔點，但我哋都做過學生，都明白佢嗰種辛苦，所以今集Chill好傾，就等我哋幾個主持分享下讀書時嘅感受畀呢位小女孩聽聽，睇下幫唔幫到佢啦！

仲有記得逢星期一、五晚上，準時收聽我哋Chill好傾，同你茶餘飯後，笑談新聞。