近年有班人，對香港嫌三嫌四，就移民去外地追求所謂嘅自由，但係走咗真係好？恐怕佢哋係唔走唔知香港好，所以有唔少人走咗都要回流返嚟。

前行政會議成員林奮強接受一個電台訪問時，就提到移民問題。林奮強話，世界其他地區經濟都有問題，稅率比香港高好多。佢以英國為例，話收入大約萬零港元嘅人，已經要交兩成稅，佢笑住話：「香港人移咗民之後，先會明白自由嘅寶貴。」又表示，歐美唔少國家嘅稅率令你「絕不自由」。

林奮強又提到外國嘅治安問題，舉例話自己幫政府監管過一啲海外獎學金運用，接觸到嘅海外留學生，差唔多每一個喺過往兩三年都被人打劫過，佢話因為黃種人喺海外會被認為係好恰，遇到嘅歧視可能會較多。

記得有部電影嘅對白係「唔賭唔知時運到」，呢班為自由而走嘅人，可能就係「唔走唔知香港好」，啱嘅，所謂身在福中不知福，咪去啲「自由國度」體驗吓，等佢哋知道喺香港時係幾咁舒適。

原圖：星島日報

https://std.stheadline.com/realtime/article/1906448/