中美角力，已唔係一朝一夕嘅事。本來，中國只係努力做好自己國家嘅發展，點知有一日，美國發覺，中國嘅國勢開始威脅到佢哋！所以，自居為世界老大哥嘅美國，就開始不惜一切咁打壓中國，為嘅，就係阻止我哋迎頭趕上，影響佢哋所謂嘅一哥地位！

之前老美對中國嘅政治打壓，包括老屈間諜、禁止售賣晶片、華為副董事長孟晚舟案等，相信大家都記憶猶新。

中國底子厚，中國人又夠堅毅，點會因為受到打壓就跪低？老美一計不成，二計又生，就改為文化打壓。

較早前，紐約時報中文版就刊出咗一篇有關電影《流浪地球2》嘅評論，狠批「近三小時錯綜複雜的故事線、漏洞百出的主題和混亂的、顯然得到了國家認可的政治潛台詞」、「站不住腳的觀點」，又辣埋第一部，話「設定或許可笑」。

中國有自己嘅科幻片，係中國電影嘅嬌傲。但係喺老美眼裡頭，中國做乜都係唔好嘅，所以科幻片嘅觀點會「站不住腳」，設定係「可笑」。

想問吓美帝，有咩科幻片嘅設定係好實在、喺現實中能夠發生嘅？《阿凡達》裡頭嘅外星人，老美係咪可以確定佢哋存在？潘朵拉星喺邊？佢哋有冇飛船可以飛得到去南門二星系？

科幻片就係充滿幻想元素，要用現實角度去雞蛋裡挑骨頭，係可以搵到好多不合理，但係吓吓要合理，又何來科幻？

再講「政治潛台詞」，電影又要拉到政治話題上？OK，要數歷史上有幾多荷里活電影宣揚過大美國主義嘅，怕且搵到天光都未數完！老美有愛國嘅電影人拍戲歌頌自己嘅國家，點解中國唔可以？點解會被形容係得到國家認可的政治潛台詞？中國電影人唔可以愛國咩？

由政治打壓，去到文化打壓，老美千方百計去抹黑中國，可惜嘅係，無論佢哋做幾多嘢，係得嘅就係得嘅！好片就自然多人睇，根據維基百科資料，《流浪地球2》票房高達37.3億人民幣，數字話咗畀我哋聽，套戲並唔係紐約時報所講嘅咁差，相反，係吸引到數以千萬計入場人數去睇嘅好戲，老美，你哋嘅所作所為，又再一次徒勞喇！