香港同內地全面通關，對外亦開始同世界恢復往來關係，帶動經濟重上軌道，特首李家超更親自率領團隊，前往中東說好香港故事，吸引外資嚟到香港投資。

黑暴消散、疫情退去，香港開始復常，需要投放更多資源、心力去發展經濟時，政府實在唔應該太過重手「派糖」。唔好忘記喺疫情期間，港府多次派錢、派消費券，已然大傷元氣，舊年外匯基金又虧損約2千億港元，政府財政儲備跌至8千億港元水平。喺咁嘅情況下再大手筆派糖，似乎唔太合適。加上通關後經濟開始復甦，巿民對派糖嘅需求，亦不如疫情期間咁大。

當此政府需要回氣休養生息之時，民主黨就《財政預算案》召開記者會，建議向全民派發15000元，包括18歲以下人士，並建議公屋免租一個月，綜援同公共福利出雙糧等。又建議向新冠康復者發放一次性「長新冠醫療津貼」。

派福利要量力而為

向巿民派福利係好事，但亦應量力而為，喺2020年派發$10000現金，同埋2021、2022年派消費券，政府已經用咗差不多2000億。今年已經開始復常，經濟方面相信會開始有起色，巿民嘅困難相對少咗。喺呢個時候竟然提出向全民派$15000，隨時榨乾政府，講嘅人到底係幾唔理智？

民主黨本來係泛民第一大黨，喺《香港國安法》實施後，出現一浪浪跳船潮，已大不如前。佢哋提出咁嘅所謂建議，令人猜想，係咪想籠絡民心，爭取巿民支持？事關民主黨主席羅健熙亦都有表示，話如果區議會選舉方式不變，民主黨一定會參選新一屆區議會。

明晒，下巴輕輕咁亂建議，原來係為未來選舉鋪路。齋講又唔使成本，講到天花龍鳳都冇問題，到時政府唔派嘅，仲可以乘機鬧政府，呢招認真高！不過，今時今日嘅香港人，仲受唔受呢一套呢？民主黨呢個如意算盤，恐怕未必打得響。

與其搞小動作嚟博人氣，不如做返啲實事，幫助巿民同埋建設社會，相信咁會得到多啲人嘅支持，點都好過耍小聰明吖！

原圖：星島日報

https://std.stheadline.com/realtime/article/1873848/