正當中國熱熱鬧鬧過緊農曆新年，但世界有些地方卻未必太平。例如俄烏戰場，依然戰雲密佈。照目前嘅形勢睇，亂局短期內都難以平息。

俄烏兩國之間嘅軍事衝突，應是2022年最受世界矚目的新聞。自2022年2月尾開始，戰事至今持續已近一年。

單憑烏克蘭自身嘅軍事實力，明眼人都知唔可能同俄羅斯打到膠著狀態，之所以到而家都未至於兵敗如山倒，原因係以美國為首嘅西方國家一直源源不絕咁輸血畀烏克蘭，等烏克蘭充當「打手」，替西方打代理人戰爭。

其實西方國家本身都冇諗住去得咁盡，例如美國、英國咁，不惜犧牲本土國民嘅部分利益，而且，洗濕咗個頭，點都要泵水畀烏克蘭繼續撐落去。另外，再加上「愛哭的孩子有奶吃」，喜劇演員出身嘅烏克蘭總統澤連斯基絕對係世上數一數二嘅、最識利用社交傳媒傳播力嘅用家。佢喺個人社交專頁嘅發帖頻率之高，令人咋舌，又經常想方設法喺各大國際場合蒲頭（就算視像形式都照殺）。

呢，舊年12月18日舉行嘅卡塔爾世界盃決賽當日，澤連斯基就想播條片，宣揚佢嘅「理念」，等全世界人都知道佢係正義嘅化身喎，好在卡塔爾主辦方冇畀佢得逞，如果唔係，就連足球都要畀政治騎劫，失去原本嘅光彩！

唔知係咪美帝都知少少咩叫開年飯，消停咗兩日就無風起浪了！1月25日，美國同德國就決定向烏克蘭提供主戰坦克，話係要幫烏克蘭保護領土喎！其中美國將交付31輛M1坦克，德國就會支援14輛豹2主戰坦克。明眼人都知佢哋嘅意圖，但美國總統拜登都係要出嚟表個態，話佢哋咁做只係協助烏克蘭保護領土，唔會對俄羅斯構成「進攻性」威脅。坦克唔係用嚟進攻唔通用嚟擺？

睇返過去呢幾十年，無論係以前嘅蘇聯定係而家嘅俄羅斯，美西等國都唔buy，一定要針鋒相對。所以烏克蘭先得到西方國家全方位無微不至嘅支援。去到咁盡，令俄烏雙方都冇得落台階，試問又點創造和談條件令雙方止戈呢？究竟係幫緊烏克蘭定係陷害烏克蘭呀？大家睇返伊拉克、敘利亞呢啲國家而家點，相信就會有答案啦！俄烏亂局難平，今年睇怕都係多事之秋咯！

原圖：澤連斯基Twitter、克里姆林宮Twitter、拜登FB

https://twitter.com/ZelenskyyUa?ref_src=twsrc%5Egoogle%7Ctwcamp%5Eserp%7Ctwgr%5Eauthor

https://twitter.com/KremlinRussia_E

https://www.facebook.com/joebiden/photos