致力道路安全，人人有責！尋日（7日），網上流出多條行車記錄儀影片可見，上月30日下午，有至少5輛電單車在大埔汀角路上高速飛馳，左穿右插，場面相當危險。交通警立即驅車追截，最終發現「車隊」嘅帶頭人係一名69歲嘅退休鐵騎士！更發現車隊中有「P牌」仔（新手駕駛者）！交通警見狀，忍唔住苦頭婆心咁對呢位退休鐵騎士表示，「條命好緊要㗎」，「條命你賠唔返畀人阿媽呀！」

據影片顯示，當時帶頭嘅鐵騎士接連喺高速行駛中嘅機動車之間左穿右插，軌跡遍及兩條行車線。交通警見狀，立即對車隊作出追截，最終喺汀角路及大發街交界，車隊因交通燈口停車，交通警先至追到車隊。交通警對呢位退休鐵騎表示，揸電單車揸到好似「舞龍咁」，自己咁樣都算，但竟然仲帶埋班後生仔一齊路，魯莽駕駛，係對佢嘅生命嘅不負責。呢名鐵騎士畀交通警嘅勸告講到深感慚愧，多次向警員道歉，並表示警員嘅呢番說話令佢「刻骨銘心」。影片擺上網之後，引起頗大迴響，有網民就大讚警員「字字鏗鏘字字精警，一個字都冇講錯」。

香港警察素來都好有責任心，但對於呢位苦口婆心咁對危險駕駛鐵騎士作出勸告嘅交通警，小編真係忍唔住要讚一句：良心好警察！

原圖：香港鐵騎館FB影片截圖

https://www.facebook.com/HKBikerHub/videos/1075996236419031/