英國首相卓慧思上任僅僅45日，便成功展示自己的無能，喺巨大壓力宣布下台，足證英國政壇選人用人嘅兒戲！作為已故英女王伊利沙伯二世最後一位正式任命嘅英揆，卓慧思創下歷史，成為英國史上最短命首相，真係名留青史囉！目前，英國經濟問題嚴重，通脹高企，面對這個爛攤子，依然不少政客想衝入熱廚房接班，前任英揆約翰遜更盛傳翻閹選過。據報道，下周保守黨將會選黨魁，最快結果將會喺24日公布。

卓慧思尋日（20日）喺首相府前宣讀聲明表示，自己喺經濟極嚴峻嘅時候上任，而佢提出嘅經濟政策對整個市場造成巨大衝擊，喺黨內亦遭到黨友非議，於是決定辭職，並已知會英皇陛下。

至於外界傳出嘅幾位下任英揆熱門人選，仲包括前財相辛偉誠、下議院領袖莫佩琳。另外，呼聲好高嘅前首相約翰遜亦傳會殺出。究竟「英國版侵侵」會唔會翻閹成功？如果真係掂咗，會唔會為美國嘅「原版侵侵」、同樣好想捲土重來選美國總統嘅特朗普打咗支強心劑？

英國政治真如同佢哋引以為傲嘅英式幽默一樣，隨便換人，隨便頒布國家政策，隨便推國民落深淵。卓慧思用事實證明乜嘢叫一蟹不如一蟹，唔知換咗個人之後，英國會唔會有起色呢？全世界都好想知道！

原圖：卓慧思Twitter、約翰遜Twitter

https://twitter.com/trussliz/status/1583089419824730112/photo/1

https://twitter.com/BorisJohnson/status/1558720379450966018/photo/1