正因為有家人同師長教誨，曾經嘅誤入歧途嘅小伙子先會迷途知返，取得今日嘅成就！35歲高級督察（輔警）王家俊，服務警隊已14年，佢正職係伊斯蘭脫維善紀念中學嘅體育老師。面對全校9成以上都係南亞裔學生，王家俊用自己年輕時險入歧途、後來找到人生方向嘅經歷，幫助學生更好地融入社會。抵讚！

出身基層家庭嘅王家俊，自小鍾情運動，疏於學習，亦曾因此喺球場上結識咗壞朋友。由於會考失利，家人好狼狽咁陪佢周圍搵學校，令王家俊下定決心要畀心機。後來，佢喺伊斯蘭脫維善紀念中學就讀預科，並順利考到浸會大學體育及管理文學士（榮譽）學位課程。對紀律部隊感興趣嘅王家俊，喺2008年透過「輔警大學生計劃」加入警隊。

感恩當年師長教誨 從事教育

王家俊當年能夠迷途知返，好大原因係有一班師長對佢諄諄善誘，亦令佢想從事教職，於是佢喺大學期間仲拎埋教育文憑。咁啱喺2012年，伊斯蘭脫維善紀念中學老師邀請佢返母校任教，於是佢正式成為一名體育教師。

由於伊斯蘭脫維善紀念中學主要以南亞裔學生為主，因此王家俊想用自身經歷，教識佢哋學識堅毅、自信。佢仲組織唔同嘅活動，等外界多啲了解南亞裔人士，減少大眾對佢哋嘅偏見。另外，王家俊仲向學生傳授法律知識，希望學生遵紀守法，並鼓勵佢哋長大後投考警隊。

王家俊作為過來人，深知揀啱人生前路有幾緊要，所以更加落力去幫助基層，真係抵讚！撐你！

原圖：警聲

https://www.police.gov.hk/offbeat/1218/chi/