移民各有異心，如何成事？但有位港媽而家就好頭痛，因為佢老公臨門嗰陣縮沙話唔移民！佢喺網上討論區發帖話，佢老公突然話唔去原因係英文唔好，驚過到英國搵唔到工云云。港媽就有啲憂心了，擔心自己一個人喺英國照顧唔到6歲大嘅仔。

呢位港媽喺帖文話，佢哋一家三口都已經成功申請到英國移民簽證，但佢而家有啲憂心嘅地方在於，佢只有一年左右嘅積蓄，再加上老公已經明確講咗唔去，要留返喺香港工作打拼。所以佢而家猶疑緊帶唔帶埋6歲大嘅囝囝過去英國，因為佢一諗到要自己去租屋、搵學校、買餸煮飯一腳踢，同埋最大問題在於語言方面，「我自己英文麻麻」，而且「未去過當地」。

另一個更現實嘅問題係要夫妻兩地分居，呢位港媽表示，佢做運輸行業嘅老公叫佢「要學識獨立，不在他身邊也可以生存到」。

有唔少網友見到佢嘅情況，都畀好多意見。有網友勸佢三思，一來存款唔多，或無法適應當地生活，亦有網友話，夫妻兩地分居，對感情嘅考驗好大。

無論呢位港媽最後決定係點，但現實角度去睇，一個女人帶住6歲嘅小朋友喺陌生嘅國度開始新生活，相信會困難重重啦！

原圖：星島日報、素材網

https://hd.stheadline.com/news/realtime/hk/2371570/