國際瘋傳美國眾議院議長佩洛西將於今晚抵達台灣，事件不只加劇緊張局勢，更生產出大量花生。傳媒爆料，原來台灣民進黨當局曾經撤回對佩洛西的邀請，但此舉引發佩洛西興師問罪。你知啦，民進黨對住美國冇腰骨、冇膊頭㗎嘛，唯有繼續安排接待囉。

報道指，根據「台灣駐美代表處」回報所謂「外交部」，佩洛西喺7月20日主動打電話畀台方「駐美代表」蕭美琴，話會於8月3日率團訪台。但美國國安會印太事務協調員坎貝爾期後打電話畀蕭美琴，講到明如果佩洛西訪台可能遭遇嘅安全風險同埋中國可能嘅威嚇行徑。民進黨都清楚知道呢壇嘢將引發另一場台海危機，可能衰過1996年台海危機，於是就曾靜雞雞想撤回對佩洛西嘅邀訪。

點知佩洛西就發老脾，大牌話唯有美國總統拜登親自要求，佢先再考慮，完全係一意孤行「耍大牌」。

報道又引述知情者，話佩洛西就算清楚知道訪台可能引爆台海情勢，就算連美方行政部門大力勸阻，佢仲堅持追求個人歷史定位而點都要去。

佩洛西夾硬去人哋屋企，就係為咗自己所謂嘅歷史定位，咁大個人都仲咁自私兼無聊，真係冇眼睇。

原圖：佩洛西twitter

https://twitter.com/SpeakerPelosi/status/1460414146126696456/photo/1