香港多支紀律部隊自去年底陸續改用中式步操，近日有報道指各部隊亦開始全面轉用中式敬禮，就連口令同敬語亦轉用中文，以中文「是的長官」、「對不起長官」代替英殖時期遺留落嚟嘅「Yes Sir」同「Sorry Sir」，係非常好嘅做法，亦都係去殖化嘅好開始。

香港影視向來盛產警匪片，相信好多香港人唔多唔少都會對「Yes Sir」同英式步操抱有一定情懷，霎時間話要改變，確實會令大家喺一開始唔多習慣，但香港人亦要知道，我哋回歸祖國後已經踏入第25個年頭，實在無必要再沿用殖民時期嘅傳統。如今紀律部隊改用中式步操同中文敬禮，既能彰顯愛國情懷，亦可強化國民身分認同，認祖歸宗可謂應有之義。至於情懷同回憶喇喎，將佢留返喺電影同電視之中，又何妨？

香港係中國嘅香港，但從2019年黑暴事件之中，可見仍然有一小撮黃友未能看清形勢依然戀殖，心入面始終將英國視為前宗主國，如果繼續抱住呢一種錯誤嘅心態，始終未能摒棄殖民地遺風，將來又點樣融入國家發展大局，與祖國共同富裕？香港紀律部隊轉用中式步操，意味住與中國人民解放軍保持「同一步伐」，向世界再一次強調，香港早已回歸祖國母親嘅懷抱，牛鬼蛇神勿再心存妄想！

戀殖思潮禍港甚深，香港人絕對唔想再經歷任何動亂，紀律部隊廢除英式步操係一個非常好嘅開始，期待喺候任特首李家超領導下嘅新一屆特區政府能夠繼續努力，徹底清除殖民地所遺留嘅痕跡。香港人可以做嘅事情仲有好多好多，例如某啲自以為高高在上嘅職業，頭上假髮仲有冇存在嘅必要呢？

原圖：星島日報

https://std.stheadline.com/realtime/article/1548022