辱警黃藝人王喜早前喺個人社交平台專頁上，連環po出多張血染口罩嘅大頭照，聲稱自己畀人「捅傷」，仲以為乜依家佢玩到咁重口味啊！原來，王喜話自己入境台灣時接受PCR檢測，喺採樣過程中受傷流鼻血，佢指「兇手已逃離現場」，仲講到要「報警處理」，「通緝」幫佢採樣嘅醫護人員咁話。

正常人流鼻血時嘅第一反應，相信都係即刻做應急處理止血，同埋清理乾淨，而唔係任由啲一直流一直流。有趣嘅係，王喜偏偏選擇咗一個好唔正常嘅做法，明明流到半邊面都係血，竟然抹都唔抹，由得個口罩沾滿鮮血，瘋狂自拍再po上社交平台打卡，如此舉措，實在令人費解！不過諗深一層，黃藝人向來都係靠出風頭而搵食，咁樣似乎又不難理解為何王喜要小事化大喇。

據當地疫情指揮中心發言人莊人祥表示，事發時有人員即時關心王喜，想幫佢止血兼更換口罩，但竟然遭到王喜拒絕，咁就梗係啦！如果真係止血換口罩，做唔到血跡斑斑嘅視覺衝擊，畫面唔靚，仲點樣打卡博同情？不過慘遭踢爆嘅王喜就好唔忿氣，竟然將po出莊人祥黑白照，仲帶侮辱性咁寫「我不知道莊人祥是誰」，最終引發台灣網民不滿，令事件持續發酵，幾近引發港台矛盾。

雖則王喜繼續死撐，不過今次睇嚟就得唔到「手足」支持喇！同樣身為黃藝人，已移居台灣嘅杜汶澤驚死自己會畀王喜拖累咁款，急急腳以所謂「台港文化交流協會」創辦人嘅身份發出千字聲明，行文極盡獻媚之態，多次強調台灣「國家」地位，更劍指王喜，嘲諷咁話如果「以正常途徑申訴」，一定會得到公平對待，仲話應該「尊重別人的習慣和文化」，避免港台人士產生過多衝突云云，又一味感謝台灣包容，感謝台灣同情，當正台灣人係神咁拜，臨尾仲要補多句「你們沒有欠香港人什麼，這樣已經很足夠」，爭在未有拍片跪低叩頭「謝主隆恩」，一句到尾，咪就係怕得罪台灣人，移居黃友再冇立足之地囉！

先不論事件誰對誰錯，是否屬於醫療事故，但初到台灣嘅王喜好明顯就唔知規矩，竟然仲以為自己可以好似喺香港嗰陣咁口不擇言，家陣見到曾經口臭冠絕香江嘅杜汶澤，移居台灣竟然不再臭口，盡顯卑微一副奴才相只為討好台灣主子，王喜應該都明白仰人鼻息嘅生活會係點囉！

原圖：杜汶澤Facebook

https://www.facebook.com/photo.php?fbid=2431431913657375&set=pb.100003717698520.-2207520000..&type=3