有睇開本地足球比賽嘅球迷，相信都識得前著名球證吳超覺（覺爺）。日前，佢就從懲教署助理署長升咗做副署長！恭喜呀！

46歲嘅覺爺，曾任國際足協裁判員，係之前本地足壇好有名氣嘅一名球證，睇球迷畀佢嘅暱稱「覺爺」就知佢人氣好高啦。佢早喺1994年就成為香港足總的球證，2004年升咗做國際足協裁判員，2008年仲獲得亞洲足協精英球證嘅殊榮。佢喺上年（2021年）正式結束球證生涯。

有球迷喺網上討論區發文表示，恭喜吳Sir升職。亦有網民好幽默咁話，好在之前落球場睇波陣時冇對吳sir講過啲不敬嘅說話呀。

有懲教署嘅員工話，吳sir喺同事間口碑唔錯，仲大讚佢夠「貼地」，好樂意聽其他同事嘅意見。呢位員工仲話，希望吳sir可以照顧吓前線員工嘅福利，改善吓工作環境咁話喎。

覺爺好波！無論係做球證，定係身為懲教署副署長，都足以證明無論係喺足球場定係現實生活裡面，覺爺都會係一個公正、客觀同埋有承擔嘅人。希望覺爺可以喺新嘅職位上繼續發揮更大、更好嘅作用！靠你喇，覺爺。

原圖：星島日報、懲教署

https://std.stheadline.com/realtime/article/1824987/

https://www.csd.gov.hk/images/doc/about/about_org/dir_org_chart.pdf