世界太冷了！除了疫慌，還有俄烏戰亂！呢，有論者指出美國總統拜登去年完全錯判形勢，今年以來更圖藉深度介入俄烏衝突翻盤，將槍頭轉向外，把通脹諉過戰禍。

事實上，華府日夜兼程地向烏克蘭提供大批重型武器，鼓勵基輔以決一死戰嘅態度迎戰普京部署嘅10萬精銳之師。論者指美國出牌多多卻未見穩操勝券，相反種下不少禍根。明眼人睇到，美國沒有把俄羅斯嘅安全訴求放在眼裏，除咗忌憚俄羅斯畢竟都係個擁有核武器嘅國家，華府確實冇平視過俄羅斯，一味制裁制裁制裁！

如今，俄羅斯就係假借烏克蘭，製造出一個危機，讓你美國再次平視俄羅斯。今日烏克蘭嘅危機實質，與其說係俄烏之間嘅衝突，倒不如說是美俄兩大國之間嘅再次博弈。

不少人認為，美國佬又係「殺敵一萬，自損七千」嗰隻。正如有人指出，大國博弈，眼前嘅棋盤，拜登王牌盡出卻未見穩操勝券。歐盟為着自身利益，肯定不會只聽美國支笛，唔好忘記，今日歐盟第一大貿易夥伴，不是美國而係中國！再講，美國並非忠誠盟友，正係「美國靠得住，豬乸會上樹」！

老美講「道徳」？

呢，不必扯太遠，拜登同前總統特朗普都愛打嘴炮，早前佢發表演說，指普京嘅行動扼殺民主，更脫稿掦言普京「不能再繼續掌權」，其後知道自己失言了，死撐係「道德上」譴責俄羅斯，哈！呢啲咪「老鴉算豬黑，自己不覺得」囉！老美還講「道徳」，阿哥，你哋嘅「不義之戰」如攻打伊拉克、敘利亞等，又幾有道徳吖？講嘢！

美國人民對拜登處理俄烏之戰缺乏信心，拜登民望已跌至新低點，最新民調只有百分之四十。看來，美國面對超級通脹，而美國人民家庭收入大多未能保持收支平衡，美國人並不怪罪普京，反而係歸咎拜登政府！

講真，美國中期選舉將喺今年11月8日投票，拜登民望若然未能回升，而美國經濟又冇起色，睇怕共和黨不難翻盤，甚至「狂人前總統」特朗普說不定捲土重來！若然，歷史都真係幾趣都有！

以拜登嘅狀態，筆者感到佢好應該退下來享享晩福，何必瞎折騰！可惜權力確係強力催情劑，拜登始終未肯認老。筆者但知普京必定可繼續掌權，俄羅斯女子依然相信要嫁像普京這樣的男人，真係人比人比死人！

原圖：無綫新聞截圖