俄烏之戰爆發近一個月，已造成數百萬烏克蘭人逃離家園，成為難民。歐洲多國已收容300幾萬烏國難民，但作為烏克蘭危機始作俑者嘅美國，竟隔住個大西洋冷眼旁觀，據英國路透社援引美國國務院數據顯示，3月1日至16日，美國僅接收咗7名烏克蘭難民！
唔係呀嘛？堂堂世界第一強國，咁肉酸嘅事都做得出？真係做得出㗎，唔係點畀大家認識咩叫美式虛偽呀！拜登早前先信誓旦旦咁話，「我哋會提供金錢、食物同援助物資畀烏克蘭人，我哋亦歡迎烏克蘭難民，我哋應該張開雙臂歡迎佢哋！」言猶在耳，點知係講一套做一套，美國政客嘅虛偽與狡詐真係唔到你唔服。
美國老大哥闊佬懶理，咁就難為歐洲小弟硬食啦！據公開數據顯示，僅波蘭一國就接收咗170萬烏國難民，多個城市嘅收容能力已經爆煲，波蘭政府已嗌晒救命，懇請國際伸出援手。就連交戰國俄羅斯，出於人道主義亦接納咗18萬名烏國難民，敢問口爽荷包立嘅山姆大叔，知唔知個醜字點寫？
咁美國以咩理由對烏克蘭難民落閘？答案竟然係疫情防控......根據美國《新聞周刊》16日報道，美國邊防部門正以疫情為由，拘留試圖進入美國嘅烏克蘭難民，至少有5名烏國難民被拘。但唔少移民律師都表示，實際被拘留嘅難民人數肯定更多。報道稱，美國係依據《公共衞生保護條例》第42條拘留烏克蘭難民，喺新冠疫情初期，前總統特朗普就曾引用第42條，限制幾乎所有打算申請庇護嘅難民入境，點知拜登上台後，繼續以公共衛生考慮為由執行呢條條例。
美國貴為享譽世界嘅抗疫「差等生」，由於防控工作實在做得太差，已導致九十多萬美國人死於新冠肺炎，依家竟借防疫為由，大條道理將烏克蘭難民拒之於國門外，美式雙標，龍門任搬，果然名不虛傳呀！
其實表面君子，背後騙子係美國政府嘅一貫作風，睇返上次美國敗走阿富汗一役，大批曾效力美軍嘅阿富汗「帶路黨」申請赴美避難，點知被美國以「擔心恐怖分子混入發動恐襲」為由拒絕，充分反映美國用完即棄嘅condom文化，所以呢次拒接烏克蘭難民只不過係故技重施。
美國主導北約東擴，令俄烏衝突走到今日呢一步，美國呢個最大推手，有難以推卸嘅責任。但一如既往，大哥闖禍後又拍拍籮柚走咗，留下個爛攤子畀歐洲小弟慢慢收拾，真係冇陰功囉！連盟友都可以隨時出賣，今時今日仲對美國抱有幻想嘅黃友，唔該你哋醒下啦！
原圖：拜登facebook
投票已截止，多謝支持
返回
