香港即將回歸祖國25年，迎來的卻是第五波新冠肺炎海嘯式擴散，疫情至今愈燒愈旺，而特區政府嘅防疫抗疫政策，依然搖擺不定，朝令夕改，搞到市民對政府失晒信心。

眼見疫情已然失控，香港民意研究計劃不久前發表對特首及問責司局長最新民望，其中特首林鄭月娥評分急挫5.2分，只有26.6分，創近兩年新低！調查亦顯示有80%受訪者不滿政府應對新冠肺炎疫情嘅表現。

各位，香港曾經係「東方之珠」，大家公認嘅「福地」；亦係國際大都會、金融中心，如今安在嗎？報道指深圳封城一周中斷供港棺木，據悉港棺木數目料在幾日內耗盡，勢令火化延期。港人生死不寧，淒涼命苦至此，領屍多阻滯，出殯靠運氣，入土為安成奢望，連最後尊嚴都失埋，生為港人，豈能不悲哀？

疫情下，經濟凋蔽，百業萎縮，更多基層係手停口停，苦不堪言！

呢，面對疫情失控，依家全港究竟有幾多人確診？政府公布嘅官方數字超過100萬人，而根據港大醫學院最新推算則係358萬人中招，之前曾經話有500萬人，點都好，總之中招人數已如天上繁星，根本難以一一去數清楚！

事實上，社會隱形傳播鏈太多，連「安心出行」都自廢武功！可想而知，每日確診人數，根本無辦法有真實嘅數字，因為有太多人中招就自己居家隔離，由陽變陰亦懶得上報衛生署，尤其退休而不須攞確診病假紙者！

三月春寒料峭，廣大學生卻已提早放「暑假」，殺家長個始料不及！有啲家中唔止一隻馬騮仔，依家又到處限聚令，就連沙灘都封埋，想帶啲馬騮仔去曬吓陽光玩吓沙都No way！居住劏房戶嘅家長，可謂內外交困，唔少家長坦言感到身心俱疲！

有機構之前公布調查結果，發現基層兒童照顧者嘅壓力巨大，71%受訪者認為壓力多涉及家庭及子女，更有99%受訪者表示未能負擔未來3個月嘅開支。有家長盡訴心中困：疫情下收入緊絀，之但係百物騰貴，左支右絀，菜又貴豬肉又貴，連罐頭、雞蛋呢啲「窮人恩物」都加價唔少，家長深感難以滿足子女學習及營養需要。相關機構建議政府資助開設網上功課輔導班、增設兒童消費券等。

疫下民生多艱，政府無能，懲罰市民！筆者對本屆政府係哀莫大於心死！眼前有能力嘅親朋戚友，有經濟條件嘅走得七七八八，而年老的長者，唔少在這一波疫情下都上晒天堂！香港，已非筆者熟悉的香港！夕陽西下，唯餘羣鴉亂噪！「良政善治」不會只是一場夢吧！

原圖：星島日報、素材網

https://pixabay.com/photos/mountains-birds-silhouette-sunset-100367

https://std.stheadline.com/realtime/article/1530379