俄烏兩國對峙多時，喺美國總統拜登多次強調「不出兵」及「只制裁」下，俄羅斯再無後顧之憂，先係解放烏克蘭東部兩個城市頓涅茨克（Donetsk）同盧甘斯克（Luhansk），承認其為獨立國家並派出軍隊協助維和任務，兩日後總統普京更宣布「特殊軍事行動」，派兵進入烏克蘭，與當地軍隊交火。

執筆之時，烏克蘭已係戰雲密佈，全國多地遭到空襲，俄烏戰力差距一目了然，若無外力介入，最終結果可以話係毫無懸念，烏克蘭總統澤連斯基（Volodymyr Zelensky）亦只能向歐美求救，期待國際馳援，結果當然係得個桔啦。

其實烏克蘭過去已多次求援，希望歐洲表態，更曾要求美國總統拜登到訪，以釋出訊息威懾俄羅斯。其後大家有眼見，烏克蘭熱臉貼上冷屁股，歐洲多國僅表示會提供軍備及人道物資援助，兼且數量只能夠話係杯水車薪；美帝則空口說白話，聲稱若俄軍入侵烏克蘭，美國會「果斷回應」，然後急急腳撤僑，一副你死你事嘅姿態。

而最諷刺嘅係，烏克蘭今日困境，或多或少同美帝有關。1991年蘇聯解體之時，烏克蘭一度掌控前蘇聯逾三成核武，為全球第三核武大國，有如此實力，就算打唔過，相信亦足以令俄軍唔敢輕舉妄動。然而，當年正正係美國出面，要求烏克蘭主動放棄核武，條件係歐美各國會保障烏克蘭安全，必要時提供軍事協助。

當年誤信美帝而被過一棟，唔使問烏克蘭依家一定後悔到爆；喺亞洲大陸嘅另一邊有個小島，同樣多年嚟因「相信」美帝而有恃無恐，多番挑戰「一個中國原則」。雖筆者不願見到台海戰爭，更不願見到同室操戈，但如果嗰一日真係到來，台灣仲可以靠美帝嗎？

原圖：無綫新聞截圖，素材網