葵涌廣場日前發生一宗傷人案，五名黑衣人持棍衝入一家餅店，兩名店員不幸受傷。香港雖作為全球最安全嘅城市之一，但類似事件又未至於話從未發生，相信一般人只會當呢一單係茶餘飯後嘅新聞。不過問題就嚟喇，涉事餅店「Hk9cake」原來並非「普通」商家，而係「大名鼎鼎」嘅所謂「黃店」，成件事即刻唔普通喇！

 「Hk9cake」社交媒體專頁喺事發當晚公布CCTV片段宣布遇襲，更有意無意咁提及：「中午有懷疑親中人士落黎嘈交，下午時間亦見佢多次經過」，懷疑係踩線云云，呼籲知情人士提供資料，仲講明重酬咁話。

連登開post帶風向

「Hk9cake」曾多次發貼聲稱「不扣除成本全數營業額一半支援手足」，就連請員工都講到明要將「機會」留畀有需要嘅「手足」。黃到咁喎，畀人打？其他「手足」當然唔會善罷甘休啦！事發當晚就有人喺連登開post帶風向，將矛頭直指「親中人士」，又有人話懷疑係「中共黑手」做嘢云云，講到成件事好似係「黃店」被政權刻意針對打壓咁，成班黃友衝晒出嚟扮受害者，挑動「手足」同情心，唔通「黃色經濟圈」近排又要fat fat？

當然啦，事實係點，仍然有待警方調查，非你我可以斷言，有人鍾意帶風向係佢哋自己嘅事。中國人向來相信因果循環，正所謂惡人自有惡報，犯法又好撐暴也好，都必定會受到制裁！我哋香港人只需要做好本份，繼續相信香港警察必會儆惡懲奸！

原圖：Hk9cake Facebook影片截圖