古人說：人視水見形，視民知治不。意思是：人從水中可以看到自己的形象，從百姓精神面貌可以知道國家治理狀況。的確，一個關心市民嘅政府，對於因疫情曠日持久，禁聚令一再延長又延長，加上通關無期等，致令百業蕭條，市面一片死寂，唔少基層開工不足，有些更是手停口停，生活確實過得很苦！
戰國時嘅屈原，其《離騷」有云：長太息以掩涕兮，哀民生之多艱！筆者多希望財政司司長陳茂波，人稱「波叔」嘅財爺，也有屈原哀民生困苦嘅情懷，見到好多基層都如涸轍之鮒，知道直接紓民解困嘅方法唔係講「耶穌愛你」，係直接派錢！
政府去年向市民派發電子消費券，既推動消費又有助推廣電子支付；有商戶亦表示，消費者券一度令生意增加約2、3成，支持政府再派消費券。當然，亦有商販社團指出，市民取得消費券後，購物會較「疏爽」，譬如價錢較貴嘅海鮮等，銷情都較好，認為派消費券嘅話，巿民非得用來消費，若派現金，部分人會儲起來甚或倒錢落海去賭博。
其實，講乜都好，派乜都冇所謂，總之睇吓市道，觀察吓民情，都知民生多艱，唔同政黨及議員都要求政府再派消費券，亦有建議政府可考慮係7.1派一萬元「回歸慶典消費券」，讓社會以和諧氣氛迎接回歸25周年！
大年初二，工聯會到政總為民請願，促請政府「派糖」紓困，包括續派不少於一萬港元電子消費券、設立緊急失業援助金等。新進立法會議員陳穎欣指出，新一份財政預算案應再派發新一輪金額不少於一萬港元嘅電子消費券、推出全年上限二千元嘅電費補貼及落實公屋免租兩個月嘅措施。仲有議員指因應疫情令好多行業受壓，建議政府應提供緊急失業援助金，上限9000元，為期6個月。
事實上，正如有議員指出，縱使失業率持續下調，但仍有14.3萬人失業，情況不容忽視。喺第5波疫情肆虐下，經濟不景氣，唔少行業如酒吧、美容、健身等被一刀切停業，新年過後恐怕排住隊等執笠，高官們「飽漢不知餓漢飢」，如此非常時期，若然仲要諸多藉口，又話要「應使得使」、「慎重考慮」，咁就等同見死不救！
講真，庸官抗疫無能，靠害全民！依家因疫情持續嚴峻，好多基層因而手停口停，全城要求財爺派錢之聲此起彼落，可謂群情洶湧，財爺如有屈原一點惻忍之心，理應義無反顧，速速派錢，拯救基層市民於水深火熱中！咁財爺波叔先至係好波！
原圖：港台圖片、星島日報
https://news.rthk.hk/rthk/ch/component/k2/1631772-20220203.htm
投票已截止，多謝支持
返回
