屈穎妍早前在其博客文章引法國總統馬克龍嘅一段話，說要把那些不打疫苗嘅人折騰到底，佢咁講：「那些不打疫苗的人不再是法國公民⋯⋯當你的自由威脅到其他人的自由時，你就變得不負責任，不負責任的人不再是法國公民。」

語氣之重，確實令人驚歎。呢，筆者早前亦讀到菲律賓總統杜特爾特警告民眾嘅一番話，一樣令人驚歎，佢話：「你們自己選！打疫苗還是進監獄？」果然快人快語，令人叫絕！

反觀香港，市民相對而言十分聽話，政府一推出「疫苗氣泡」，唔打針新年過後就連上茶樓飲茶都冇得傾，其他處所如戲院、美容院、健身室等亦「行不得也哥哥」，於是見唔少長者、「頑固派」都湧住去打平生第一針！港人聽教聽話，肯本唔須要政府「折騰到底」，更不必「要拉要鎖」咁大陣仗！更加唔似外國反疫苗氣泡、疫苗護照嘅民眾，又暴動又遊行反政府「封殺自由」！

港府抗疫鬆弛無度

掉反轉頭，港府抗疫無能卻彰彰明甚。講開真係一把火！政府防疫就係鬆弛無度，寬嚴無方，主責抗疫防疫官員把關兒戲，厚待國泰機組人員，遂引爆第5波疫情，臨近農曆新年，搞到全港市民冇啖好食，食肆哀號！酒吧、美容、健身等處所哀哉！

有論者指世界網壇一哥祖高域一再被澳洲移民局取消簽證，可見澳洲政府「企硬」，唔會因為有人係網壇一哥有特權，更不會因為網壇一哥為當地帶來經濟效益就連防疫政策都不顧。反觀特區政府，屢次爆出外防輸入漏洞，給予特權人士免檢疫入境，無視佢哋帶來嘅播疫風險。好似早前荷里活影星妮歌潔曼來港拍戲免檢疫就係一例，又如放行摩根大通行政總裁戴蒙免檢疫入境；政府一味著重「經濟效益」，防疫大細超，完全不理市民觀感！

事實上，香港高官抗疫無能，鬆弛無度，加上一眾政府顧問醫生專家講嘢又一時一樣，各有各講，一時話疫情受控一時又話風險未除，政府一聲延長「停業令」又搞到食肆雞毛鴨血，花市取消，花農無處散貨，損失慘重，認真苦過弟弟！其他如酒吧、戲院、美容、健身等行業又再吊鹽水！

今個農曆新年，市居苦過弟弟！年關難過年年過，今年恐怕真係過不了！

法國總統要把不打疫苗嘅人折騰到底，香港庸官卻把香港變「死城」，打了疫苗嘅人被折磨到冇啖好食，痛不欲生！大佬吖！仲先苦後甜？都苦死了！還能回魂嘗甜嗎？

原圖：星島日報

https://std.stheadline.com/realtime/article/1364006/