年近歲晚，整單Omicron變種病毒大爆發，中港通關短期內無望！
政府防疫把關不力，急急喺年關前收緊各項防疫禁令由7日凌晨起至20日，規定食肆餐廳由6時起晚市禁堂食，BCD類每台人數上限分別下降至二、四、六人，並關閉酒吧、遊樂場、體育館等，又暫停公海遊與本地遊，為期14天。
有議員指出，新措施十分果斷，但希望疫情穩定後政府「同樣果斷地放寬限制」，又指出，去年新年飲食業已經蒙受重大損失，想不到今年再次歷史重演，估計兩星期禁晚市堂食嘅生意額損失達40億港元。
政府一夜之間使出「加辣」禁制令，殺業界一個措手不及。嗱！業界訴苦，為咗應付新年旺季，許多餐廳已經購置咗好多食物存貨，現時晚市禁堂食後，估計大批新鮮食材要浪費，加上員工要出糧，又要找年尾貨數，業界情況可謂慘不忍睹。
當然，呢個影響有漣漪效應。正如有論者話齋，港府防疫無能，喺旺季收緊防疫，飲食及零售業攬炒，有企業打定輸數關門大吉，打工仔係年關前丟掉飯碗，只怕唔係染病疫死，就係冇飯開餓死！今年辛苦經營嘅本土消費市道，又畀港府亂出招打殘。
生意冇得做，股市冇得炒，經濟將陷死寂狀態。百業蕭條加上百物騰貴，港人虎年日子將苦過弟弟矣！
講真，飲食業原想趁節日復甦，看來已無望；要關閉嘅包括酒吧、美容院、健身中心在內嘅15類表列處所。一夜又回到ICU，真係情何以堪？
至於筆者呢種退休人士，因疫苗氣泡即將實施關係，為了可以早上去茶樓嘆茶睇吓報紙，亦打了平生第一針！浮生若夢，沒有甚麼比吃更踏實！不是嗎？從小到大，有人說，人生最隆重嘅事都必須體現在吃上。生日，一桌。祭日，一桌。工作了，吃。失戀了，吃！都真係「我吃故我在」！林語堂都話：人世間如果有任何事值得我們慎重其事的，不是宗教，也不是學問，而是吃！
明乎此，港府唔好郁吓就禁堂食！
新年新希望，但願疫情快受控，新年前市民可以一家人齊齊整整，喺酒樓杯上杯落食餐團年飯！港人抗疫真係抗到身心俱疲，但願政府唔好成日甩甩漏漏，搞到香港雞毛鴨血。天佑港人，香港切勿變悲情城市！阿門！
原圖：星島日報
https://std.stheadline.com/realtime/article/1796324/
投票已截止，多謝支持
返回
