近日兩宗新聞，令筆者感觸良多。

第一宗新聞，世界上最大嘅美國半導體製造商英特爾(Intel)早前去信供應商，要求供應商承諾避免使用任何來自新疆勞工、採購產品或服務，有關內容曝光後，隨即引致中國輿論沸騰，呼籲各界抵制。

內地藝人王俊凱隨即透過其工作室官方微博發布聲明，宣布立即與英特爾解除一切合作關係，原因好簡單，「國家利益高於一切」！

王俊凱年紀輕輕，雖已出道8年但依家都只不過係22歲，已經深明國家大義，喺大是大非之前絕不退縮，哪怕對手係美國嘅巨頭公司。

再睇返香港一宗同樣涉及國家層面嘅本地新聞，所謂「國殤之柱」聳立香港大學校園多年，直至《港區國安法》出台超過一年後，港大校方先如夢初醒，10月8日去信要求支聯會移走有關雕塑，但仍然拖拖拉拉至12月22日，先至完成拆卸工程，移走褻物。

再睇埋港大校方扭扭擰擰嘅聲明，先係避重就輕咁話咩因為雕像日久老化，關注安全問題，再點出是次行動真正原因，其實只係為咗避免觸犯《港區國安法》嘅法律風險，對於國家大義，對於民族感情，隻字未提。

港大管治團隊中當然不乏中國人，而作為本地最高學府之一，做得校方高層，相信都係有學識有地位嘅社會賢達，但當有需要挺身捍衛祖國及民族尊嚴嘅時候，竟不如一個只得22歲嘅「黃毛小子」，可會感羞愧？

原圖：星島日報、王俊凱微博

https://std.stheadline.com/daily/article/2403566/