焦點

【李譯喬判囚】疑扣重要視頻瞞劉家衡離港李文浩發長文無賴卸責

2021.12.03 14:30 焦點

前深水埗區議員劉家衡與李文浩聯合辦事處，去年初於門外張貼告示寫上「藍絲與狗不能內進」，引發巿民不滿，多人上門理論，期間雙方發生衝突，涉事的劉家衡時任男助理李譯喬較早前被裁定襲擊罪成，判囚6個月2星期。劉家衡妻子潘書韻亦涉案，唯夫妻倆已逃離香港。李譯喬女朋友指責李文浩扣起涉案的重要視頻，亦有人斥李文浩隱瞞劉與妻離港一事。李文浩昨日在Facebook發長文回應，並認持有相關視頻，並指自己對隱瞞劉氏夫妻離港「冇後悔」，又透露李譯喬女朋友手持其錄音，但自己不怕，指「唔係你有錄音喺手就大曬」，並指若公開錄音，「可能搞到office嘅其他職員」，似欲藉「其他職員」安要對方把公開錄音一事三思。

叫人衝自己鬆又一例證，議助坐監，已完仲好意思出post卸責兼耍無賴，呢啲黃友真無良，手Joke又一次被用完即棄了！

李文浩回應全文如下：

話說琴晚家衡前助理呀(喬)個女友，寫咗一篇嘢嚟搞我(見留言圖)，話我哋收埋咗條片，搞到佢打輸官司，在公在私我諗都有必要正面回覆一下。

首先，從個結論講起，條片根本唔存在(下面會講)。不過我諗你意思係話，你係講緊家衡兩公婆，所以唔關我事，就算係擺明屈嘅，我都唔應該理吖嘛。OK，本身係唔關我事嘅，反正我都唔出聲咗咁耐啦，但你班友tag我呀嘛。

對於佢兩個決定走呢件事，我冇記錯係早一至兩日先知嘅，當時需要保密。而且我見到你哋今日咁嘅反應，我更加冇後悔為佢兩個保密。

冇錯，我曾經認為佢兩個粒聲唔出就走，對同一單案被告會帶來麻煩，而當時佢哋冇處理好呢件事，唔多唔少係有問題嘅。但望著而家嘅狀況，我更加覺得佢哋唔應該同任何人講。

我同李譯喬講過叫佢體諒，因為事出突然，而且office上下一齊協同做過好多嘅嘢，包括其他牽涉藍絲嘅案件。大家都互相協助過。當然啦，你之後無啦啦話office有欺凌，咁就係第二個故事啦。當時有同事想出聲反駁，都畀我撳住咗，因為我認為office有同事(唔止一個)有案係身，唔應該搞咁多嘢。

仲有，我都有話過如果有需要我可以上庭為佢作證，可惜係佢開始審訊之前，我畀國安跟蹤。你可以話我懦弱，可以話我怕坐監，講乜都得，但係我當初真係想幫佢。同埋我幫佢問過office全部同事，但係冇人有嗰一段所謂「關鍵」嘅影片。我啲同事唔可能講大話，亦都冇呢一個動機咁樣做。更加唔會出現你口中嘅，家衡兩公婆拎住條片走呢個狀況。呢一啲都係你捏造出嚟

你話我畀嗰啲cctv冇聲仲有趣，我哋部閉路電視冇收音功能，所以唔應該有聲，當然我都想有啦。遮住閉路電視，亦都係藍絲遮住。講到我想特登搞到佢冇聲同畀人遮住咁，

然之後就係你話律師表示不利證據之一，就係控方拎咗我哋facebook嘅片做證據，一嚟控方舉乜嘢證我根本控制唔到，第二對面大大支鏡頭影住office入面所有人嘅「動作」(我唔想有過多嘅演繹)。當時對面幾多鏡頭我諗佢自己親眼睇得到，摷返我哋facebook嘅片一樣可以睇得到對面有幾多鏡頭，咁你期望有條點樣嘅關鍵片段，可以還李譯喬清白呢。

而且有一點我想指出，一直聯絡我拎片嘅係辯方律師，如果佢哋懷疑有一條咁樣嘅片，點解佢哋冇搵過我講呢樣嘢。真係咁重要，審緊嘅時候你唔講，辯方律師唔搵我？審完之後先開始吹？再講一次，你話有人特登帶走條片，係你幻想出嚟。

而最後嗰點，你話你有一段錄音，指我想改email，企圖用偽造嘅方法想拎區議會開支，首先我唔知道點解，你覺得claim form係用email交啦，但其實我可以直接認咗佢。我何止想偽造，我直頭想攻入政府總部拎返啲錢添呀。

因為個結論就係，office日常運作，包括同事嘅薪金，都係我同家衡議員由銀包真金白銀拎幾十萬出嚟支撐住，包括你男朋友份糧，我哋兩個都claim唔返錢。去到呢一刻我都冇後悔過拎錢出嚟。同時好慶幸我有一班好好嘅同事，而最好彩嘅係，你男朋友亦都唔係我請返嚟嘅員工。如果唔係我一定後悔死。在任接近年半嘅時間，我幾乎扭盡六壬，都想辦法可以claim返啲錢。然而，無論我哋點樣做，點樣交claim form，到呢一刻。我都係收唔返(我唔知家衡議員，冇問過，我估佢都收唔返)。

而關於你係咁提錄音嘅呢部分，亦都係你成篇嘢我最唔滿意嘅。(喬)錄我音其實好小事，我真係唔係太過介意，我人已經唔係香港，你亦都唔會威脅到我啲咩，做嘅嘢都係為咗對抗中共，我問心無愧。

但係如果佢唔係坐緊監，而係喺你隔離，畀佢講一萬次佢都唔會承認話佢有錄音，我哋由年中開始交claim form，前後咁多個同事入職離職，由於(喬)唔係負責claim form嗰一部分，所以，我印像中佢如果要錄到音，而且同claim form有關，即係話佢錄音呢樣嘢，呢個習慣應該由好早已經開始。

你係咪傻㗎，你作為佢女朋友點解唔幫佢諗下，佢以前喺大學教，有博士學位，可以係專業人士。做議員助理，我唔知佢將來會搵咩工，但如果將來嘅老細知道佢返工係鍾意錄音嘅，真係冇影響 ? 你有冇諗過點解佢一直以嚟都冇公開爆過佢有錄音，佢一入去你就幫佢爆出嚟。真係咁有用佢就一早威脅咗我啦，你呢個行為同出賣佢有咩分別？唔係你有錄音喺手就大曬，真係大我唔到，我都唔怕你放曬出嚟搞我。不過你放曬出嚟，就有可能搞到office嘅其他職員。你哋都慣㗎啦，你個post啲朋友都叫報國安法繼續搞我。

最後，我唔怕講多少少，你哋班人私怨上腦，寫信畀唔同國家，走去用前助理身份舉報人哋，抹黑人哋收共產黨錢同埋係共諜。以我所知佢兩個為免某島國(亞洲)政府尷尬，由於佢哋兩個冇當地國民身份，所以最後先決定去歐洲。你哋咁做會唔會過份咗少少呢，我唔介意你好憎佢，但係我介意你捏造證據。喺我眼中劉家衡絕對有為民主運動付出過，即使而家同佢再冇交集我都要咁講，我冇後悔過同佢合作。

佢兩個唔出聲，唔再澄清，消失於公眾視線。唔代表全世界都要怕咗你。冇錯你同喬的確係暴政下嘅受害者，呢一點我冇質疑，我亦都好唔滿意法庭個裁決，但唔代表你係受害者就講乜都啱，旭啲就話人迫害你，你憎嗰個人就可以夾硬作啲嘢出嚟搞。咁同班metoo有咩分別。

以上所講嘅嘢都係建基於我所知所信，若果我有刻意捏造，保佑我畀外國藍絲畀搵到加私了。冇乜事我唔想再回覆呢一啲人，真係好攰，祝大家好運，完。